Prokuroria e Posaçme ka ndërmarrë veprimin më të fortë deri tani në hetimin e tenderëve të AKSHI-t, duke lëshuar urdhër-arresti për biznesmenin Ergys Agasi.
Paralelisht, është dhënë masa “arrest me burg” për Ermal Beqirin dhe “arrest shtëpie” për drejtoreshën e Agjencisë Kombëtare të Shoqërisë së Informacionit, Mirlinda Karçanaj.
Kontrollet ndaj Agasit nisën muaj më parë. Në qershor, me urdhër të SPAK, dy skuadra të BKH-së të shoqëruara nga Policia e Shtetit kontrolluan në total katër ambiente, banesa në Durrës e Tiranë, si dhe biznese të lidhura me të.
TENDERËT/ Gjysma e AKSHI në SPAK, në qendër të hetimit Ermal Beqiri dhe “pronari faktik”
Ky aksion shënoi zgjerimin e hetimit mbi dyshimet për manipulim tenderësh dhe favorizime në procedurat e zhvilluara nga AKSHI.
Ndërkohë Karçanaj, e cila tashmë ka masë në arrest shtëpie, u paraqit në SPAK vetëm disa ditë më parë, në kuadër të hetimeve për 12 tenderë të dyshuar për paracaktim.
Më 3 dhjetor, ajo qëndroi mbi tre orë në ambientet e Prokurorisë së Posaçme, por doli pa koment, duke shmangur pyetjet e gazetarëve.
Sipas SPAK, tenderat nën hetim kanë vlera të larta dhe lidhen kryesisht me mirëmbajtjen e serverave dhe sistemeve të institucioneve shtetërore. Hetuesit dyshojnë se kriteret teknike janë formuluar nga vetë kompanitë pjesëmarrëse, duke diktuar garën dhe siguruar fitime të garantuara me miliona euro.
Një nga përfituesit kryesorë të kësaj skeme, sipas Prokurorisë, është Ermal Beqiri, pronar i “Soft & Solution”, ndaj të cilit sot u caktua masa e sigurisë “arrest me burg”. SPAK pretendon se Beqiri ka përfituar shuma të konsiderueshme përmes procedurave të manipuluara.
Skyweb.al ka raportuar gjerësisht për bëmat e treshes në fjalë me tenderët e AKSHI-t.
Hetimet janë thelluar ndjeshëm ditët e fundit. Rreth 25 zyrtarë të AKSHI-t, kryesisht anëtarë të Komisioneve të Vlerësimit të Ofertave dhe të Shqyrtimit të Ankesave, janë thirrur për t’u marrë në pyetje, ndërsa skema dyshohet se ka funksionuar për një periudhë të gjatë dhe për tendera me rëndësi të lartë strategjike.
Operacioni i sotëm konfirmon se SPAK është duke çuar përpara një nga hetimet më të mëdha të korrupsionit në fushën e teknologjisë dhe prokurimeve publike. /skyweb.al
