Pas firmosjes së tetë masave sigurie për anëtarët e grupit kriminal brenda AKSHI, Prokuroria e Posaçme ka shtrirë hetimin në një rreth më të gjerë personash të lidhur me Mirlinda Karçanajn, Ergys Agasin dhe Ermal Beqirin.
Të dy biznesmenët e fundit janë shpallur në kërkim, pasi ndaj tyre është caktuar masa “arrest me burg”, ndërsa SPAK po kërkon çdo gjurmë financiare që lidhet me skemën e dyshuar të tenderëve.
Me urdhër të Gjykatës së Posaçme, janë ushtruar kontrolle në disa banesa dhe janë sekuestruar celularë, dokumente dhe pajisje të cilat mund të shërbejnë si prova. Kontrollet janë kryer për Gëzim Toska, Renato Hristiç, Elon Ciko, Elgerti Bixha, Kreshnik Tërnova, Arjola Koromani, Endri Merkaj, si dhe subjektin “Merkaj 3”.
Arjola Koromani është administratorja e Soft & Solution, kompania kryesore që dyshohet se ka përfituar tenderët e AKSHI nën ndikimin e Ermal Beqirit. Ndërkohë, Kreshnik Tërnova, nënkryetar i Komisionit të Prokurimeve Publike, dyshohet të ketë favorizuar kompanitë e Beqirit gjatë ankimimeve në KPP, duke ndikuar në rrjedhën e procedurave.
Në fokus është edhe Elgerti Bixha, një emër me lidhje të shumta në biznesin e ndërtimit dhe sektorin e naftës në Patos.
Gjithashtu, janë miratuar kontrolle për vetë personat nën masë sigurie: Ermal Beqiri, Ergys Agasi, Erjon Ismaili, Mirlinda Karçanaj, Hava Delibashi, Andis Papa, Gëzim Hoxha dhe Rogers Rryta. Pjesë e skemës sipas SPAK kanë qenë edhe kompanitë Fastech dhe FIRST, të cilat po ashtu kanë fituar dhjetëra miliona euro nga tenderët e AKSHI-t.
SPAK ka lejuar sekuestrimin e çdo objekti që mund të dokumentojë lëvizjet financiare apo veprimet e paligjshme të grupit.
Skema, Ermal Beqiri “hinka” e parave të AKSHI, SPAK po heton faturat
Skyweb.al mëson se në qendër të hetimeve po çojnë në zbulimin e një mega-skandali të tenderëve të AKSHI është kompania Soft & Solution e Ermal Beqirit, e cila dyshohet se është përdorur nga persona që kanë pasur nën kontroll vendimmarrjen e Mirlinda Karçanajt.
Sipas burimeve, pasi tenderët merreshin nga Soft & Solution, kompania angazhonte gjoja për marrje shërbimesh një ose dy kompani të lidhura me personazhet që kontrollonin Karçanajn dhe KVO-në në AKSHI duke pranuar fatura, ndërsa puna në fakt bëhej po nga stafi i Ermal Beqirit.
Kjo bëhej për justifikuar më pas transfertat financiare përmes kontratave të shërbimit.
SPAK po heton pikërisht faturat e shërbimeve të marra nga Soft & Solution, pas dyshimeve se të paktën një kompani në emër të një biznesmeni të njohur ka lëshuar fatura të shumta për shërbime fiktive ndaj kësaj kompanie.
Burime të Skyweb.al bëjnë me dije se SPAK ka verifikuar edhe një adresë në qendër të Tiranës, që ka shërbyer deri para disa muajsh si zyrë për kompanitë e përfshira.
Në këtë hetim, SPAK po ndjek parimin “ndiq paratë”, me synimin për të zbuluar rolin e Beqirit si person që ka funksionuar si “hinkë” për kanalizimin e parave publike të AKSHI-t drejt xhepave të atyre që dyshohet se kanë organizuar skemën.
Përveç Soft & Solution, Ermal Beqiri është gjithashtu pronar i kompanisë Horizon.
Të dyja kompanitë kanë fituar rreth 40 milionë euro tendera publike gjatë viteve të fundit, ku pjesa dërrmuese vjen nga AKSHI. /skyweb.al
