Gjatë muajit nëntor, Inspektorati Shtetëror i Punës ka intensifikuar kontrollet në tregun e punës me qëllim garantimin e zbatimit të legjislacionit dhe mbrojtjen e të drejtave të punëmarrësve. Sipas të dhënave zyrtare, gjatë kësaj periudhe janë inspektuar gjithsej 768 subjekte në të gjithë vendin.
Kontrollet kanë përfshirë verifikimin e 17 mijë e 206 vendeve të punës, ku janë konstatuar një sërë parregullsish në përmbushjen e detyrimeve ligjore nga ana e punëdhënësve. Gjatë muajit nëntor nuk është kryer asnjë inspektim këshillues, ndërsa të gjitha kontrollet kanë pasur karakter verifikues dhe ndëshkues.
Si pasojë e shkeljeve të evidentuara, Inspektorati i Punës ka vendosur 492 masa administrative, duke reflektuar një nivel të lartë problematikash në respektimin e standardeve ligjore të punës. Paralelisht, janë trajtuar edhe 69 ankesa të paraqitura nga qytetarë dhe punëmarrës, të cilat janë shqyrtuar në përputhje me procedurat ligjore.
Autoritetet bëjnë të ditur se kontrollet do të vijojnë edhe në muajt në vijim, në kuadër të forcimit të zbatimit të ligjit, rritjes së sigurisë në vendin e punës dhe garantimit të kushteve më të drejta për punëmarrësit. /skyweb.al
