Kryeministri Edi Rama, së bashku me ministrin e Financave Petrit Malaj dhe ministren e Ekonomisë dhe Inovacionit Delina Ibrahimaj, zhvilluan një takim me përfaqësues të bizneseve, ku në fokus ishte diskutimi mbi Paketën Fiskale 2026.
Gjatë fjalës së tij, kreu i qeverisë theksoi se nisma e paqes fiskale synon të rrisë formalizimin e bizneseve dhe njëkohësisht të ulë barrën tatimore. Rama u shpreh se kjo nismë përfshin të gjitha bizneset që nuk kanë çështje të hapura gjyqësore, duke shtuar se paqja fiskale tashmë është ligj dhe ishte pjesë e angazhimeve elektorale të qeverisë.
“Paqja fiskale sot është ligj. Nga janari 2026 mund ta zbatojmë këtë nismë. Ne duam të ndërtojmë një urë komunikimi të shëndetshme mes sipërmarrjes dhe administratës tatimore. Kjo u jep mundësi bizneseve të vetëkorrigjohen, duke rishikuar deklarimet e viteve të mëparshme. Qëllimi është rritja e formalizimit dhe ulja e tatimit,” deklaroi Rama.
Ai shtoi se qeveria pret një përmirësim të klimës së biznesit në vend, ndërsa sqaroi se përfitues do të jenë vetëm subjektet që nuk kanë probleme ligjore apo procese gjyqësore që cenojnë legjitimitetin e të ardhurave. Sipas tij, gjobat do të trajtohen në mënyra të ndryshme, nga fshirja e plotë deri te pagesa me këste të lehtësuara, në varësi të periudhës.
Gjatë takimit, kryeministri u përfshi edhe në një debat me një sipërmarrës, i cili kërkoi uljen e taksës së infrastrukturës. Rama iu përgjigj duke theksuar se sektori i ndërtimit ka qenë ndër përfituesit më të mëdhenj nga politikat shtetërore. Ai kritikoi faktin se ende në këtë sektor deklarohen paga minimale, rreth 50 mijë lekë, duke kërkuar më shumë përgjegjësi nga ndërtuesit.
“Ndërtuesit duhet të paguajnë punëtorët siç duhet, të investojnë në cilësinë e ndërtimeve dhe të kontribuojnë realisht në ekonomi,” u shpreh Rama, duke nënvizuar nevojën për rritjen e standardeve dhe formalizimit në këtë sektor. /skyweb.al
