Pas megaskandalit të zbuluar nga SPAK në AKSHI, sistemi digjital i shtetit po shfaq probleme serioze funksionimi.
Prej më shumë se një jave, portali qeveritar e-Albania nuk ofron normalisht shërbimet, ndërsa paralelisht ka rënë edhe faqja zyrtare e Komisionit të Prokurimit Publik (KPP), institucioni që shqyrton ankimimet për tenderat publikë.
Situata vjen pas operacionit të gjerë të SPAK dhe BKH, ku një grup i strukturuar kriminal dyshohet se ka manipuluar tendera publikë me vlerë qindra miliona euro.
Arrestimet dhe shpalljet në kërkim të personave kyç kanë nxjerrë në pah jo vetëm abuzimet me fondet publike, por edhe brishtësinë e sistemeve digjitale shtetërore, për të cilat janë shpenzuar miliona euro.
Në faqen e e-Albania vijon të shfaqet i njëjti njoftim për “mirëmbajtje dhe përmirësim sistemi” nga Drejtoria e Përgjithshme e Gjendjes Civile, por në praktikë shërbimet janë të bllokuara ose funksionojnë me vonesa të mëdha. Bizneset raportojnë se nuk arrijnë të kryejnë aplikime apo pagesa, ndërsa qytetarët hasin vështirësi në shërbime bazë, si regjistrimi i fëmijëve të porsalindur, aplikimet për dokumente identifikimi apo rinovimi i pasaportave.
Problemi është ngritur publikisht edhe nga Aleanca për Profesionistët e Lirë, e cila paralajmëron se ndërprerja e platformave digjitale krijon pasiguri juridike, vonesa procedurale dhe rrezik penalitetesh për bizneset dhe profesionistët që varen pothuajse tërësisht nga shërbimet online të shtetit.
Sipas verifikimeve të skyweb.al, situata rëndohet edhe më tej nga mosfunksionimi i faqes së Komisionit të Prokurimit Publik, në një moment kur ky institucion kishte volum të lartë pune për shkak të përplasjeve të forta mes bizneseve për tenderat e AKSHI-t.
Më herët, skyweb.al raportoi edhe për kontrolle ndaj nënkryetarit të KPP-së, Kreshnik Ternova, i dyshuar për lidhje me grupin Agasi–Beqiri dhe për dhënie informacioni të brendshëm.
Rënia njëkohësisht e e-Albania dhe KPP-së, pas një skandali që përfshin fonde publike me vlerë qindra miliona euro, ngre pikëpyetje serioze mbi mënyrën se si janë shpenzuar këto para, mbi sigurinë dhe qëndrueshmërinë e sistemeve digjitale dhe mbi varësinë totale të administratës nga platforma që, në momente krize, rezultojnë të pafunksionuara.
Në një periudhë fundviti, kur fluksi i emigrantëve në Shqipëri është i lartë dhe kërkesa për shërbime shtetërore rritet ndjeshëm, “blackout”-i digjital po kthehet në një problem real për mijëra qytetarë dhe biznese, duke ekspozuar pasojat konkrete të një sistemi të ndërtuar me kosto të larta, por me funksionim të brishtë. /skyweb.al
