Kompania amerikane e aviacionit Boeing ka siguruar një kontratë në vlerë 8,58 miliardë dollarë në kuadër të “Programit Izraelit F-15”, njoftoi Departamenti Amerikan i Mbrojtjes (Pentagoni).
Sipas njoftimit, kontrata përfshin projektimin, integrimin, instrumentimin, testimin, prodhimin dhe dorëzimin e 25 avionëve luftarakë të rinj F-15IA për Forcat Ajrore Izraelite. Marrëveshja parashikon gjithashtu një opsion për blerjen e edhe 25 avionëve të tjerë të të njëjtit tip.
Punimet do të realizohen në Saint Louis, Missouri, ndërsa përfundimi i projektit pritet më 31 dhjetor 2035.
Pentagoni sqaroi se kontrata realizohet në kuadër të shitjeve ushtarake të huaja për Shtetin e Izraelit dhe është dhënë përmes një procedure me burim të vetëm.
Shtetet e Bashkuara mbeten aleati kryesor dhe furnizuesi më i madh i armëve për Izraelin.
Njoftimi u bë publik një ditë pas takimit mes presidentit amerikan Donald Trump dhe kryeministrit izraelit Benjamin Netanyahu, i cili u zhvillua në Florida./skyweb.al
