Franca pritet të shqyrtojë në muajin janar një projektligj që synon ndalimin e përdorimit të mediave sociale për fëmijët nën moshën 15 vjeç, si dhe kufizimin e telefonave celularë në shkollat e mesme, raportoi sot “FranceInfo”.
Sipas planit, Këshilli i Shtetit do të analizojë projektligjin më 8 janar. Nisma parashikon ndalimin e aksesit në rrjetet sociale për të miturit nën 15 vjeç dhe ndalimin e përdorimit të telefonave celularë në shkollat e mesme, duke nisur nga viti i ri shkollor në shtator 2026.
Burime qeveritare bëjnë me dije se projektligji është hartuar në përputhje me legjislacionin evropian, ndryshe nga një përpjekje e mëparshme që nuk arriti të miratohej për shkak të mospërputhjeve ligjore.
Në muajin nëntor, presidenti francez Emmanuel Macron deklaroi se synon zgjerimin e ndalimit të telefonave celularë edhe në shkollat e mesme që nga viti shkollor 2026–2027, si dhe vendosjen e një ndalimi për përdorimin e mediave sociale nga të rinjtë nën moshën 15 ose 16 vjeç.
Aktualisht, përdorimi i telefonave celularë është i ndaluar nga kopshti deri në shkollën e mesme, bazuar në një ligj të miratuar në vitin 2018, megjithëse zbatimi i tij ka hasur vështirësi në praktikë.
Autoritetet franceze e mbështesin këtë nismë edhe në studime të shumta akademike, të cilat kanë evidentuar rreziqet që përdorimi i mediave sociale paraqet për shëndetin mendor të të rinjve, si dhe ndikimin negativ të telefonave celularë në përqendrimin dhe performancën shkollore të adoleshentëve. /skyweb.al
