Ndërsa Durrësi vijon të përballet me përmbytje dhe problematika të shumta pas reshjeve të forta, kryeministri Edi Rama ka reaguar sërish publikisht, duke e lidhur situatën me sjelljen e qytetarëve ndaj mjedisit.
Në një postim në rrjetin social X, Rama shkruan se hedhja pa kriter e mbeturinave, veçanërisht e shisheve plastike, ka çuar në bllokimin e kanaleve kulluese. Sipas tij, kjo është arsyeja kryesore pse reshjet e shiut përkthehen në përmbytje të gjera në zonat urbane.
Kryeministri thekson se mbeturinat hidhen në fusha, përgjatë rrugëve dhe në zona të hapura, ndërsa më pas reshjet i grumbullojnë dhe i shtyjnë drejt kanaleve dhe grykëderdhjeve. Kur shiu është i zakonshëm, këto mbetje përfundojnë në det, por në rastet e reshjeve intensive, kanalet bllokohen plotësisht dhe uji del nga shtrati.
“Kur i hedhim plehrat dhe shishet plastike vend e pa vend, vjen një ditë shiu që i mbledh dhe i çon drejt detit. Por kur shiu është aq i furishëm sa këto ditë, gryka e kanalit taposet dhe përmbyt gjithçka përreth”, shkruan Rama.
Në reagimin e tij, kryeministri përdor edhe një shprehje ironike, duke thënë se “Shqipërinë e duam vetëm në stadium”, në një kritikë të drejtpërdrejtë ndaj mungesës së përgjegjësisë qytetare për mbrojtjen e mjedisit.
Deklarata vjen në një kohë kur disa zona të Durrësit janë përmbytur, rrugë janë bërë të pakalueshme dhe banorët po përballen me dëme materiale, ndërsa institucionet vijojnë përpjekjet për menaxhimin e situatës. /skyweb.al
