Gjykata e Posaçme ka vendosur ndryshimin e masës së sigurisë për CEO-n kinez të Bankers Petroleum, Hongping Xiao, duke e liruar nga qelia dhe duke e vendosur në arrest shtëpie. Vendimi është marrë pak ditë pasi, me kërkesë të SPAK, Gjykata e Posaçme zgjati me tre muaj afatet e hetimit për dosjen e njohur si “Bankers”.
Sipas Prokurorisë së Posaçme, zgjatja e hetimeve është kërkuar për shkak të nevojës për kryerjen e veprimeve të tjera procedurale, të diktuara nga kompleksiteti i çështjes dhe volumi i madh i të dhënave financiare që po analizohen.
Deri në këtë vendim, Hongping Xiao ishte i vetmi i pandehur në këtë dosje që mbahej në masën e arrestit në burg. Të pandehurit e tjerë janë lënë në masa sigurie më të lehta, kryesisht arrest shtëpie.
Hetimet ndaj Bankers Petroleum lidhen me dyshime për deklarime të rreme tatimore dhe shmangie të detyrimeve financiare për një periudhë të gjatë kohore, nga viti 2004 deri në vitin 2024. Sipas SPAK, këto veprime dyshohet se kanë shkaktuar një dëm të konsiderueshëm në buxhetin e shtetit.
Prokuroria pretendon se kompania ka realizuar shitje dhe eksporte nafte me një vlerë totale prej rreth 532 miliardë lekësh, ndërkohë që për çdo vit ka deklaruar humbje financiare, me një total prej rreth 11.7 miliardë lekësh. Sipas akuzës, kjo skemë ka shërbyer për të shmangur tatimin mbi fitimin dhe për të përfituar rimbursime të dyshimta të TVSH-së.
Ndërkohë, ndaj kompanisë ka edhe masa administrative. Pas raportimeve ekskluzive të Skyweb.al për mbajtjen në sirtarë për disa vjet të një gjobe 120 milionë euro, Drejtoria e Përgjithshme e Doganave ka bllokuar aktivitetin e Bankers Petroleum për shkak të mospagimit të saj.
Çështja “Bankers” mbetet nën hetim, ndërsa vendimi për ndryshimin e masës së sigurisë për drejtuesin e kompanisë ka rikthyer vëmendjen publike te një nga dosjet më të mëdha financiare të trajtuara nga drejtësia e posaçme. /skyweb.al
