Prokuroria e Durrësit ka nisur hetimet pas përmbytjeve të rënda të dy ditëve të fundit në qytetin bregdetar. Me urdhër të drejtueses së prokurorisë, Suela Beluli, është regjistruar procedim penal për veprat: “Shpërdorimi i detyrës”, “Shkatërrimi i pronës me përmbytje” dhe “Shkatërrimi i pronës nga pakujdesia”.
Sipas prokurorisë, reshjet e pandërprera kanë shkaktuar problematika serioze për qytetarët, duke cenuar mirëqenien e tyre dhe duke sjellë dëme të konsiderueshme materiale. Situata ka penguar zhvillimin normal të aktiviteteve arsimore, shtetërore dhe shëndetësore, ka bllokuar rrugë urbane dhe interurbane, ka përmbytur banesa dhe ka vënë në rrezik real jetën e qytetarëve. Po ashtu, është përmbytur edhe institucioni penitenciar, duke vendosur në gjendje emergjente të gjithë qarkun e Durrësit.
Në këto rrethana, prokuroria vlerëson se ka të dhëna të mjaftueshme për ekzistencën e një fakti penal dhe ka nisur hetimet për të përcaktuar nëse pasojat kanë ardhur vetëm si rezultat i faktorëve natyrorë apo edhe si pasojë e pakujdesisë ose mospërmbushjes së detyrës nga organet shtetërore apo të vetëqeverisjes vendore.
Hetimi përfshin edhe rastin e vdekjes së një punonjësi të Ndërmarrjes Komunale të Plazhit. Sipas informacioneve paraprake, ai kishte shkuar në zonë për të verifikuar situatën e krijuar nga reshjet dhe dyshohet se ka humbur jetën pasi është marrë nga rrjedha e ujit. Prokuroria njofton se, bazuar në rrethanat e deritanishme, ekzistojnë dyshime të arsyeshme për veprën penale të “Shpërdorimit të detyrës”, të kryer nga personat përgjegjës për mirëmbajtjen, kontrollin dhe menaxhimin e situatës.
Sipas organit të akuzës, dyshohet se veprime ose mosveprime të personave të ngarkuar me funksione publike kanë përbërë mospërmbushje të rregullt të detyrës, duke sjellë dëme të rënda në pronën publike dhe private, si dhe pasoja fatale në jetën e një qytetari.
Prokuroria thekson se, në bazë të dëmeve të evidentuara deri më tani në infrastrukturë dhe prona private, ekzistojnë gjithashtu dyshime për veprat penale të “Shkatërrimit të pronës me përmbytje” dhe “Shkatërrimit të pronës nga pakujdesia”. Hetimet do të vijojnë për të përcaktuar përgjegjësitë penale përkatëse. /skyweb.al
