Një alarm sigurie u aktivizua të enjten në mëngjes (15 janar) në aeroportin El Prat të Barcelonës, pasi një avion i Turkish Airlines u detyrua të kryente një ulje emergjente për shkak të një kërcënimi për bombë. Bëhet fjalë për një Airbus A321 që po operonte fluturimin TK1853 nga Stambolli drejt Barcelonës, me mbërritje të planifikuar rreth orës 11:00.
Avioni ishte nisur nga Stambolli në orën 09:00 dhe, pak para uljes, autoritetet u informuan për një kërcënim të mundshëm, çka solli aktivizimin e menjëhershëm të protokolleve të emergjencës. Në një deklaratë zyrtare, Aena konfirmoi se “për shkak të një kërcënimi u vunë në zbatim masat e nevojshme të sigurisë”, duke shtuar se “Forcat e Sigurisë po vlerësojnë situatën”.
Autoritetet theksuan gjithashtu se incidenti nuk ndikoi në funksionimin normal të aeroportit. Pas një uljeje të sigurt, të gjithë pasagjerët u evakuuan nga avioni, ndërsa ekipet e specializuara nisën kontrolle të detajuara brenda tij.
Sipas mediave spanjolle, dy avionë luftarakë shoqëruan fluturimin e Turkish Airlines deri në momentin e uljes, në kuadër të masave standarde të sigurisë për raste të tilla.
Hetimet vijojnë, ndërsa deri tani nuk ka informacion zyrtar nëse janë gjetur objekte të dyshimta në bord. /skyweb.al
