Prej më shumë se një jave, dhjetëra biznese, ekonomistë dhe kontabilistë po raportojnë probleme serioze në ushtrimin e aktivitetit të tyre, për shkak të mosfunksionimit të sistemit SelfCare, i cili aksesohet përmes platformës e Albania.
Sipas tyre, bllokimi i sistemit po pengon transmetimin e të dhënave të faturave të fiskalizuara dhe deklaratave doganore, duke krijuar pasiguri për përmbushjen e detyrimeve ligjore. Për shumë subjekte, problemi vijoi edhe në orët e para të mëngjesit të sotëm, pa asnjë njoftim zyrtar mbi zgjidhjen e situatës.
Mosfunksionimi i SelfCare ka paralizuar proceset e përditshme të raportimit, ndërsa bizneset po përballen me mungesë informacioni dhe pamundësi komunikimi me institucionet përgjegjëse.
I pyetur nga gazetarët gjatë një konference për shtyp, Drejtori i Përgjithshëm i Tatimeve, Ilir Binaj, u shpreh se të dhënat që nuk arrijnë të raportohen mund të mblidhen dhe të deklarohen në një fazë të dytë.
Sipas tij, sistemet tatimore janë ndër më të avancuarat dhe janë në proces të vazhdueshëm zhvillimi, përfshirë edhe përdorimin e inteligjencës artificiale. Ai pranoi se gjatë funksionimit mund të shfaqen problematika teknike, të cilat sipas tij adresohen nga strukturat e teknologjisë së informacionit.
Megjithatë, drejtori i Tatimeve nuk dha asnjë afat konkret se kur do të rikthehet normalisht funksionimi i sistemit dhe as se kur do të konsiderohet periudha e dytë e raportimit për bizneset e prekura.
Ndërkohë, profesionistë të fushës kanë nisur dhjetëra ankesa zyrtare me email drejtuar institucioneve përkatëse, ku kërkojnë ndërhyrje të menjëhershme për zgjidhjen e situatës.
Në një prej ankesave thuhet se vonesat dhe bllokimi i sistemit po rrezikojnë përmbushjen e detyrimeve ligjore të bizneseve, duke krijuar pasiguri dhe stres të panevojshëm për subjektet tatimpaguese.
Deri në këto momente, nuk ka një reagim zyrtar nga platforma e Albania apo një njoftim publik mbi arsyet e bllokimit dhe kohën e rikthimit të plotë të shërbimit. /skyweb.al
