Ministri i Financave, Petrit Malaj, dhe Drejtori i Përgjithshëm i Tatimeve, Ilir Binaj, prezantuan sot rezultatet e deritanishme të Planit Sektorial në sektorin e ndërtimit, gjatë një konference për mediat të fokusuar te lufta kundër informalitetit dhe rritja e formalizimit fiskal.
Ministri Malaj theksoi se vendi ndodhet në vitin e dytë të zbatimit të strategjisë afatmesme të të ardhurave, e cila synon jo vetëm rritjen e të ardhurave buxhetore, por edhe përmirësimin e administrimit fiskal.
Sipas tij, një nga objektivat kryesore të kësaj strategjie është formalizimi i sektorëve me risk të lartë, ku ndërtimi dhe turizmi mbeten ndër më problematikët.
Gjatë kontrolleve, administrata tatimore ka evidentuar shkelje serioze në aktivitetin e agjencive imobiliare, përfshirë mungesën e transparencës së çmimeve, mosdeklarimin e pagave dhe moslëshimin e faturave tatimore.
Ministri Malaj deklaroi se fokusi i institucioneve është formalizimi i tregut të punës, deklarimi real i pagave dhe pasqyrimi korrekt i xhirove që realizohen në sektorin e ndërtimit.
Ai bëri të ditur se në nëntor 2025 administrata tatimore ndërmori një nismë të posaçme kundër informalitetit, në kuadër të së cilës mbi 13 mijë mesazhe ndërgjegjësuese iu dërguan subjekteve që operojnë në këtë sektor.
Sipas të dhënave të prezantuara, ka një rritje të numrit të punonjësve që paguhen në fashat nga 700 deri në 1000 euro, si dhe shtim të punonjësve me paga mbi 120 mijë lekë. Megjithatë, ministri pranoi se një pjesë e subjekteve nuk kanë reaguar ende ndaj njoftimeve të administratës tatimore.
Nga ana e tij, Drejtori i Përgjithshëm i Tatimeve, Ilir Binaj, deklaroi se vetëdeklarimet e deritanishme kanë treguar një rritje të moderuar të pagave të deklaruara, ndërsa procesi ndodhet ende në fazën fillestare.
Sipas Binajt, në fazën e parë të aksionit janë mbledhur databazat e çmimeve nga agjencitë imobiliare, të cilat do të shërbejnë për analizë të mëtejshme.
Faza e dytë e planit do të përqendrohet te nënkontraktorët, ku do të verifikohet burimi i financimit, ndërsa faza e tretë do të fokusohet te ndërtuesit që nuk kanë reflektuar detyrimet fiskale.
Aksioni në sektorin e ndërtimit pritet të përfundojë në maj të vitit 2026, ndërsa risi në këtë proces do të jetë përpunimi i informacionit që vjen nga palë të treta, si pjesë e mekanizmave të rinj të kontrollit fiskal. /skyweb.al
