Aeroportet italiane kanë ngritur alarmin për vonesa të gjata dhe radhë kilometrike gjatë sezonit veror për shkak të sistemit të ri biometrik të kontrollit kufitar të Bashkimit Evropian, i njohur si Entry/Exit System (EES). Drejtuesit e aeroporteve paralajmërojnë se pritjet për pasagjerët mund të arrijnë deri në gjashtë orë në pikat më të mbingarkuara.
Paralajmërimi është dhënë nga Marco Troncone, drejtori ekzekutiv i kompanisë që administron aeroportet e Romës, Fiumicino dhe Ciampino. Sipas tij, sistemi i ri po rezulton i papërshtatshëm për fluksin e madh të udhëtarëve që pritet gjatë korrikut dhe gushtit, duke rrezikuar të shkaktojë “një katastrofë operative” në kulmin e sezonit turistik.
Sistemi EES, i cili hyri në funksion të plotë në pranverë, kërkon që qytetarët nga vendet jashtë BE-së të regjistrojnë gjurmët e gishtërinjve dhe fotografinë e fytyrës kur hyjnë për herë të parë në zonën Schengen. Megjithatë, probleme teknike dhe mosfunksionimi i terminaleve automatike kanë shkaktuar vonesa të konsiderueshme në disa aeroporte evropiane.
Sipas Shoqatës Ndërkombëtare të Transportit Ajror (IATA), në aeroportet më të mbingarkuara koha e pritjes mund të arrijë deri në gjashtë orë gjatë muajve të verës. Operatorët aeroportualë po kërkojnë më shumë fleksibilitet në zbatimin e sistemit, madje edhe pezullimin e përkohshëm të kontrolleve biometrike kur fluksi i pasagjerëve bëhet i papërballueshëm.
Nga ana tjetër, Komisioni Evropian këmbëngul se sistemi funksionon normalisht në vendet e zonës Schengen dhe se vonesat lidhen kryesisht me mungesën e personelit, kufizimet infrastrukturore dhe përqendrimin e fluturimeve në të njëjtat orare.
Ekspertët paralajmërojnë se, nëse problemet teknike vazhdojnë, vera e këtij viti mund të shoqërohet me kaos në disa nga aeroportet më të rëndësishme të Evropës, duke prekur miliona turistë dhe udhëtarë ndërkombëtarë. /skyweb.al
