Michael O’Leary, drejtori ekzekutiv i Ryanair, mbetet një nga figurat më të debatueshme në industrinë ajrore europiane, por edhe një nga më të suksesshmet.
Kështu e përshkruan revista The Economist kreun e kompanisë më të madhe ajrore në Evropë, duke theksuar se pas stilit të tij të ashpër dhe shpesh provokues fshihet një model biznesi që ka kthyer Ryanair në një makineri fitimi.
Artikulli ndalet fillimisht te përplasja e fundit publike mes O’Learyt dhe miliarderit Elon Musk, pasi ky i fundit e quajti “idiot” drejtuesin e Ryanair për refuzimin e instalimit të internetit satelitor Starlink në avionët e kompanisë.
O’Leary iu përgjigj me ironi, duke nisur një fushatë promocionale të quajtur “big idiot sale” dhe duke e falënderuar Musk për publicitetin falas.
Edhe pse Musk kërcënoi me blerjen e kompanisë, The Economist vëren se një gjë e tillë nuk është e mundur, pasi ai nuk është shtetas i Bashkimit Evropian.
Sipas revistës, nëse një blerje e tillë do të ishte e lejueshme, Ryanair do të ishte një investim ideal.
Për më shumë se 30 vite, O’Leary e ka transformuar kompaninë nga një linjë ajrore e vogël dhe me fitime minimale në transportuesin më të madh të kontinentit.
Sot, Ryanair operon me mbi 640 avionë dhe përfaqëson rreth një të pestën e kapacitetit ajror të Evropës.
Në rezultatet e fundit financiare të publikuara më 26 janar, kompania deklaroi se pret të transportojë rreth 208 milionë pasagjerë në vitin financiar që përfundon në prill.
Kjo shifër është afërsisht dyfish më e lartë se ajo e EasyJet dhe gati trefishi i Wizz Air, dy konkurrentët kryesorë në segmentin low cost.
The Economist thekson se suksesi i Ryanair nuk lidhet vetëm me volumin e pasagjerëve, por mbi të gjitha me fitimin.
Marzhi neto i kompanisë arrin rreth 15 për qind, ndërkohë që mesatarja globale e industrisë ajrore mbetet rreth 4 për qind.
Ky dallim e ka kthyer Ryanair në një përjashtim në një sektor që tradicionalisht përballet me humbje dhe paqëndrueshmëri financiare.
Edhe në bursë, performanca e kompanisë ka qenë dukshëm mbi tregun.
Që nga fillimi i vitit 2023, aksionet e Ryanair janë rritur me rreth 130 për qind, duke lënë pas ndjeshëm industrinë globale të aviacionit.
Në analizën e saj, revista nënvizon se stili i Michael O’Learyt mund të mos jetë i pëlqyer dhe shpesh krijon polemika, por rezultatet flasin vetë. Në një industri ku shumë linja ajrore mbijetojnë falë mbështetjes shtetërore, Ryanair vazhdon të rritet, të zgjerojë tregun dhe të dominojë qiellin europian. /skyweb.al
