Të dhënat e publikuara për importet e tetorit 2025 tregojnë një lëvizje të fortë në tregun e kafesë, duke shënuar nivelet më të larta të regjistruara ndonjëherë si në vlerë, ashtu edhe në volum.
Me mbi 863 milionë lekë vlerë dhe mbi 1,334 ton të importuara, kafeja ka kapur majën absolute të serisë së dhënave. Ky është një sinjal i qartë i kërkesës së lartë dhe i furnizimit të qëndrueshëm gjatë këtij muaji, por jo vetëm. Viti 2025 ka thyer rekord muaj pas muaji.
Megjithëse importet e kafesë kanë shpërthyer në vëllim, çmimi mesatar për kilogram ka rënë me rreth 8% krahasuar me tetorin e vitit të kaluar. Kjo do të thotë se rekordi i vlerës nuk është rezultat i një çmimi më të lartë, por thjesht i një sasie shumë më të madhe që ka hyrë në vend. Pra, rritja është e udhëhequr nga volumi, jo nga çmimi.
Kakaoja: më pak kilogramë, por shumë më e shtrenjtë
Në krahun tjetër, kakaoja sjell një histori krejt tjetër. Tetori është vlera e dytë më e lartë, por çmimi mesatar për kilogram është rritur me gati 29%. Importet në peshë kanë rënë dukshëm, rreth një të tretën, por kjo rënie është shoqëruar me shtrenjtim të konsiderueshëm të kakaos.
Kafeja dhe kakaoja, megjithëse shpesh grupohen bashkë si mallra bujqësore tropikale, këtë tetor sjellin dy narrativë krejt të ndara. Për kafenë, kemi një treg të gjallëruar nga volumi, që sugjeron stabilitet ndërkombëtar dhe ndoshta avantazhe të çmimeve të importit. Për kakaon kemi një treg të tendosur me rritje të çmimit në tregjet ndërkombëtare.
Për industrinë e përpunimit të kafesë, ky është një muaj i mirë me furnizim të bollshëm dhe çmim mesatar i ulur. Ndërsa për industrinë e çokollatës, biskotave dhe prodhimeve të tjera të bazuara në kakao, situata është më e vështirë. /tvscan
