Qeveria do t’i detyrojë të gjithë bizneset në vend të kenë të paktën një terminal POS, duke u ofruar klientëve mundësinë për të kryer pagesa me kartë. Masa është pjesë e një pakete të re fiskale dhe vjen si pjesë e planit të qeverisë për reduktimin e përdorimit të parasë fizike në ekonomi.
Ministrja e Ekonomisë dhe Inovacionit, Delina Ibrahimaj, në Forumin Connect të Pagesave Digjitale, deklaroi se qeveria ka përgatitur një plan të detajuar masash për uljen e cash-it, i cili javën e ardhshme do të diskutohet me bankat, kompanitë fintech dhe institucionet publike.
Sipas saj, detyrimi për POS do të zbatohet në mënyrë të shkallëzuar, derisa deri në fund të vitit 2026 çdo tregtar të ketë të paktën një mjet elektronik pagesash.
Ibrahimaj theksoi se kjo lëvizje është thelbësore për të luftuar informalitetin dhe për të rritur performancën e inovacionit në Shqipëri. Ajo kujtoi se vendi ka digjitalizuar tashmë 98% të shërbimeve publike dhe renditet ndër më të avancuarit në Europë për ofrimin e tyre online, por ka ende mangësi në digjitalizimin e pagesave.
Sipas ministres, ekonomia shqiptare nuk mund të marrë përfitimet maksimale nga digjitalizimi pa kaluar edhe në modernizimin e mënyrës se si kryhen pagesat. Prandaj, kalimi drejt metodave elektronike shihet si hallka që mungon për të mbyllur ciklin e transformimit digjital në vend. /skyweb.al
