Një valë e re nostalgjie për vitin 2016 po përhapet me shpejtësi në rrjetet sociale, duke rikthyer në vëmendje muzikën, estetikën dhe mënyrën e përdorimit të internetit të asaj periudhe. Sipas Wall Street Journal, gjithnjë e më shumë përdorues të TikTok dhe Instagram po i kthehen qëllimisht pamjes dhe frymës së mesit të viteve 2010, një kohë që shumë e kujtojnë si më të thjeshtë dhe më pak të lodhshme dixhitalisht.
Video të shkurtra, foto me filtra të vjetër, kujtime nga Instagram-i i hershëm dhe referenca ndaj Snapchat-it apo Vine-it po dominojnë përmbajtjen virale. Përdoruesit shpesh e përshkruajnë vitin 2016 si një moment kur rrjetet sociale nuk ishin ende të dominuara nga algoritmet, presioni për perfeksion dhe gara për vëmendje. Interneti shihej më shumë si vend argëtimi dhe lidhjeje, jo si skenë performance.
Në qendër të këtij rikthimi qëndron edhe muzika. Këngë që dominuan listat në vitin 2016, veçanërisht nga artistë si Drake dhe Rihanna, po dëgjohen sërish masivisht dhe po përdoren si sfond për videot nostalgjike. Mbrëmje tematike me muzikë të asaj kohe po organizohen në klube nate, ndërsa playlist-at e dedikuara vitit 2016 po fitojnë popullaritet të ri.
Sipas Wall Street Journal, ky trend lidhet ngushtë me mënyrën se si përdoruesit, veçanërisht ata në fund të të 20-ave dhe fillim të të 30-ave, po përballen me lodhjen nga rrjetet sociale moderne. Për shumë prej tyre, 2016 përfaqëson një periudhë para polarizimit të thellë politik, para pandemisë dhe para transformimit të plotë të mediave sociale në platforma të drejtuara nga influencues dhe marketing.
Ekspertët e kulturës digjitale theksojnë se nostalgia nuk ka të bëjë vetëm me vitin 2016 si datë, por me ndjesinë e kontrollit dhe optimizmit që njerëzit mendojnë se kishin atëherë. Rikthimi i kësaj estetike shihet si një formë arratisjeje nga pasiguria e së tashmes dhe një përpjekje për të rikrijuar një ndjenjë sigurie dhe autenticiteti.
Fenomeni po shfaqet si një prirje globale dhe, sipas analistëve, mund të ndikojë jo vetëm në përmbajtjen online, por edhe në modë, muzikë dhe mënyrën se si platformat sociale do të përpiqen të tërheqin përdoruesit në të ardhmen. /skyweb.al
