Një numër gjithnjë e më i madh studimesh sugjeron se disa njerëz janë shumë më të prirur të përhapin viruset e frymëmarrjes, përfshirë gripin dhe Covid-19 – sesa të tjerët. Këta quhen “supershpërndarës”, shkruan BBC.
Shkencëtarët vlerësojnë se në shumicën e shpërthimeve, 20% e njerëzve shkaktojnë rreth 80% të infeksioneve. Arsyeja kryesore është se sasia e virusit në lëngjet e frymëmarrjes ndryshon shumë nga personi në person – disa kanë miliona herë më shumë virus se të tjerët.
Faza e infeksionit ka rëndësi të madhe. Kur një person është më i sëmurë, ai nxjerr shumë më tepër grimca infektuese me frymëmarrje dhe të folur. Studime kanë treguar se gjatë infeksionit rritet ndjeshëm numri i aerosoleve të vogla, të cilat qëndrojnë më gjatë në ajër dhe depërtojnë më thellë në mushkëri.
Të folurit me zë të lartë, të kënduarit dhe shqiptimi i fortë i disa tingujve si T, K dhe P prodhon më shumë grimca. Njerëzit që flasin me zë të lartë ose janë “close talkers” kanë më shumë gjasa të përhapin virusin. Edhe disa zanore prodhojnë më shumë aerosole se të tjerat.
Personat mbipeshë, meshkujt mbi 40 vjeç dhe ata me kapacitet më të madh të mushkërive kanë më shumë gjasa të jenë supershpërndarës, sepse nxjerrin më shumë ajër dhe grimca gjatë frymëmarrjes. Fëmijët, për shkak të mushkërive më të vogla, kanë më pak gjasa të luajnë këtë rol. /skyweb.al
