Një shpresë e re në luftën kundër kancerit të pankreasit vjen nga Spanja. Mariano Barbacid, drejtues i grupit të Onkologjisë Eksperimentale në Qendrën Kombëtare Spanjolle për Kërkime mbi Kancerin (CNIO), ka prezantuar rezultatet e një studimi premtues të kryer mbi minj, ku u arrit eliminimi i qelizave kancerogjene të formës më të zakonshme dhe më agresive të këtij tumori: adenokarcinoma duktale pankreatike (PDAC).
Sipas studimit, terapia jo vetëm që çoi në zhdukjen e qelizave tumorale për një periudhë rekord, por gjithashtu shfaqi ndjeshëm më pak efekte anësore krahasuar me trajtimet ekzistuese.
“Për herë të parë kemi arritur një përgjigje të plotë, të qëndrueshme dhe me toksicitet të ulët kundër kancerit të pankreasit në modelet eksperimentale. Këto rezultate tregojnë se terapia e kombinuar mund të ndryshojë rrjedhën e këtij tumori,” u shpreh Barbacid gjatë një konference për shtyp, së bashku me bashkautorët Carmen Guerra, Vasiliki Liaki dhe Sara Barrambana.
Megjithëse nevojitet ende kohë përpara se të fillojnë provat klinike te njerëzit, rezultatet janë inkurajuese: tumori u regresua plotësisht te modelet shtazore për rreth 200 ditë, pa u shoqëruar me efekte anësore serioze, falë përdorimit të një kombinimi prej tre barnash.
Trajtimi eksperimental bazohet në tre ilaçe që synojnë mekanizmat kryesorë të rritjes së tumorit: dy prej tyre veprojnë kundër proteinave EGFR dhe STAT3, ndërsa i treti synon onkogjenin KRAS – faktorin kryesor nxitës të kancerit të pankreasit, i studiuar prej vitesh nga ekipi spanjoll.
Ilaçet që synojnë KRAS përfaqësojnë një hap të rëndësishëm në trajtimin e këtij lloji kanceri, pasi ky gjen është i mutuar në rreth 90% të pacientëve. Megjithatë, deri më tani, efekti i tyre ka qenë i kufizuar për shkak të zhvillimit të shpejtë të rezistencës nga tumori. Pikërisht këtë pengesë synon të kapërcejë studimi i ri, duke hapur rrugë për trajtime më efektive në të ardhmen.
