Qeveria ka hedhur për konsultim një projektligj që ndryshon mënyrën si merren vendimet për projekte, plane dhe strategji me ndikim në mjedis, duke forcuar ndjeshëm rolin e komunitetit.
Sipas draftit, asnjë dokument mjedisor nuk do të mund të miratohet pa kaluar më parë në një proces të detyrueshëm konsultimi me publikun, raporton skyweb.al.
Risia kryesore është se nëse procedurat e konsultimit nuk respektohen, akti mund të shpallet i pavlefshëm për shkak procedural.
Kjo do të thotë se mungesa e përfshirjes së komunitetit nuk do të jetë më një formalitet i anashkalueshëm, por një shkak real për anulimin e vendimeve.
Projektligji parashikon që konsultimi të mos kufizohet vetëm në publikimin e dokumenteve në regjistrin elektronik, por të kombinohet edhe me takime të drejtpërdrejta me qytetarët.
Qëllimi është që të përfshihen edhe banorët e zonave rurale apo grupet që nuk kanë akses të rregullt në internet.
Institucionet do të kenë detyrimin të njoftojnë në kohë, të publikojnë dokumentacionin dhe të argumentojnë se si janë marrë në konsideratë komentet e komunitetit.
Ndryshimet vijnë si pjesë e përpjekjeve për të përmirësuar kuadrin ligjor ekzistues, i cili deri më tani është kritikuar për boshllëqe dhe për konsultime të realizuara në faza të vona, kur vendimet praktikisht ishin marrë.
Drafti synon ta zhvendosë përfshirjen e publikut në fazat e hershme të hartimit të projekteve, kur ndikimi i komunitetit është real.
Projektligji lidhet edhe me angazhimet e Shqipërisë në procesin e integrimit evropian dhe me detyrimet për harmonizimin e legjislacionit me standardet e Bashkimit Evropian për transparencë dhe pjesëmarrje në çështjet mjedisore.
Sipas relacionit shoqërues, zbatimi i këtij projektligji nuk pritet të ketë kosto shtesë për buxhetin e shtetit. Megjithatë, ai rrit ndjeshëm përgjegjësinë e institucioneve publike, pasi çdo projekt mjedisor i miratuar pa konsultim të plotë rrezikon të përballet me sfida ligjore dhe anulim. /skyweb.al
