Me afrimin e sezonit të lëvizjeve më të shtuara gjatë pranverës dhe verës, Drejtoria e Përgjithshme e Doganave ka publikuar një njoftim informues për udhëtarët që hyjnë në Shqipëri lidhur me vlerën e mallrave që përjashtohen nga detyrimet doganore.
Sipas autoritetit doganor, udhëtarët që vijnë nga një shtet tjetër përjashtohen nga taksat e importit për mallrat që ndodhen në bagazhin personal, me kusht që lloji dhe sasia e tyre të mos tregojnë qëllim tregtar.
Për udhëtarët që hyjnë në territorin shqiptar nëpërmjet rrugës tokësore, vlera e mallrave që përjashtohen nga detyrimet doganore, pa përfshirë produktet e duhanit dhe alkoolit, është deri në 300 euro.
Ndërkohë, për udhëtarët që udhëtojnë me rrugë ajrore ose detare, kufiri i përjashtimit është 430 euro për çdo udhëtar, ndërsa për personat nën moshën 15 vjeç vlera e lejuar është deri në 150 euro.
Doganat theksojnë se në rastet kur mallrat tejkalojnë këto kufij ose kanë natyrë tregtare, udhëtari është i detyruar t’i deklarojë ato në hyrje në territorin shqiptar. Autoritetet kanë të drejtë të kërkojnë kontroll dhe paraqitjen e të gjitha mallrave që transportohen.
Për mallrat me natyrë jo tregtare që tejkalojnë kufirin e pataksueshëm, procedura kryhet përmes “deklarimit të thjeshtuar” doganor.
Sipas Drejtorisë së Përgjithshme të Doganave, ky informim synon të shmangë problematikat për qytetarët dhe të parandalojë kalimin e mallrave të pataksuara për qëllime tregtare, duke rritur qartësinë mbi detyrimet ligjore në kufi.
