Euro ka rënë për herë të parë nën kufirin e 92 lekëve, duke prekur minimumin e ri historik ndaj monedhës shqiptare.
Sipas kursit zyrtar të Bankës së Shqipërisë për 11 shtatorin, një euro u këmbye me 91.94 lekë, 0.06 lekë më pak se një ditë më parë. Që nga fillimi i vitit 2026, euro është zhvlerësuar me rreth 5%, ndërsa rënia vjetore arrin në 5.3%.
Faktori kryesor mbetet oferta e lartë e euros në tregun shqiptar, e ushqyer nga turizmi, remitancat, eksportet e shërbimeve dhe investimet e huaja, veçanërisht në pasuritë e paluajtshme.
Vetëm gjatë gjashtëmujorit të parë, turizmi solli 957 milionë euro të ardhura neto, 20% më shumë se një vit më parë. Investimet e huaja direkte arritën në 1.144 miliardë euro, me rritje 50%.
Presion shtesë kanë dhënë edhe zhvillimet ndërkombëtare. Forcimi i dollarit dhe pritshmëritë për rritjen e interesave nga Rezerva Federale kanë dobësuar euron në tregjet globale.
Në Europë, shtrenjtimi i naftës dhe gazit ka rritur frikën për inflacionin dhe ngadalësimin ekonomik. Banka Qendrore Europiane rriti interesin bazë nga 2.25% në 2.50%, por tregjet u shqetësuan se shtrëngimi i mëtejshëm mund të godasë konsumin dhe investimet në Eurozonë.
Megjithatë, rënia në 91.94 lekë shpjegohet kryesisht nga forcimi i lekut dhe flukset e mëdha valutore brenda Shqipërisë, ndërsa faktorët ndërkombëtarë kanë luajtur rol plotësues. /skyweb.al
