Apeli i Posaçëm ka vendosur të lërë në fuqi masat e sigurisë për zyrtarët dhe biznesmenët e përfshirë në dosjen e Agjencisë Kombëtare të Shoqërisë së Informacionit (AKSHI), një nga hetimet më të bujshme të SPAK mbi abuzimet me tenderat publikë.
Me këtë vendim, drejtoresha e AKSHI-t, Mirlinda Karçanaj, mbetet në masën e “arrestit shtëpiak”, së bashku me zëvendësen e saj, Hava Delibashi.
Në të njëjtën kohë, Apeli ka lënë në fuqi edhe masën e pezullimit nga detyra për zëvendësdrejtorin e Policisë së Tiranës, Erion Ismailaj, si dhe masën e “detyrimit për paraqitje” për tre biznesmenët Gëzim Hoxha, Andis Papa dhe Rogers Rryta.
Vendimi i Apelit vjen në një fazë kyçe të hetimit, ndërsa SPAK ka dorëzuar prova të reja, duke kërkuar vijimin e masave të sigurisë për personat e akuzuar.
Provat shtesë lidhen kryesisht me dëshminë e ish-zëvendësdrejtorit të AKSHI-t, Daniel Shima, i cili ka dhënë deklarime të detajuara mbi mënyrën e funksionimit të agjencisë dhe procedurat e tenderëve.
Në dëshminë e tij, mësohet se Shima ka pohuar se të gjitha vendimmarrjet janë kryer nën udhëzimet direkte të Mirlinda Karçanajt, duke deklaruar se AKSHI funksiononte i dirigjuar prej saj dhe se çdo vendim merrej vetëm me miratimin e drejtoreshës.
Këto deklarime konsiderohen nga hetuesit si elementë kyç që rëndojnë më tej pozitat juridike të Karçanajt, si edhe të Ergys Agasit, i cilësuar si “truri” i skemës, dhe Ermal Beqirit.
Në dosjen hetimore përfshihen edhe transaksione financiare, që lidhen me kompani të afërta me Ermal Beqirin, kompaninë Porsche Albania dhe familjarë të Mirlinda Karçanajt.
Konkretisht, bëhet fjalë për blerjen e një automjeti me vlerë rreth 39 mijë euro, i cili rezulton në përdorim të bashkëshortit të Karçanajt, Artan Babameto. Po ashtu, hetimet përmendin edhe një kontratë qiraje apartamenti, e cila, ndonëse figuron në emër të një kompanie të lidhur me Beqirin, dyshohet se lidhet drejtpërdrejt me interesat e Karçanajt.
Të pandehurit akuzohen se kanë vepruar në formën e një grupi të strukturuar kriminal, duke abuzuar në mënyrë sistematike me tenderat publikë të AKSHI-t. /skyweb.al
