Telefonat modernë nuk bëjnë thjesht foto – ata i ndërtojnë ato me ndihmën e algoritmeve dhe AI-së. Çdo herë që shtyp butonin e kamerës, telefoni kombinon disa imazhe, rregullon dritën, ngjyrat, mpreh detajet dhe redukton turbullirën për të krijuar një foto “më të bukur” sesa ajo që sensori kap realisht. Ky proces quhet fotografi llogaritëse, shkruan BBC.
Në shumicën e rasteve, këto përmirësime e bëjnë fotografinë më të këndshme dhe më afër asaj që shohim me sy. Por ndonjëherë, telefonat shkojnë shumë larg. Shembulli më i famshëm është Samsung dhe fotot e Hënës: AI e njeh Hënën dhe shton detaje që nuk ekzistojnë, duke krijuar një imazh të bukur, por jo real.
Edhe pa funksione ekstreme, si filtrat e bukurisë apo “Best Take” i Google (që kombinon fytyra nga momente të ndryshme), çdo telefon ka stil të vetin, si fotografë të ndryshëm. Kjo mund të çojë në foto tepër të lëmuara, plastike, ose me detaje që duken si “halucinacione” kur zmadhon imazhin.
Kjo ngre pyetje për autenticitetin e kujtimeve: a po dokumentojmë realitetin, apo po e rregullojmë atë sipas shijes së algoritmeve? Megjithatë, këto mjete u japin përdoruesve të zakonshëm aftësi që dikur i kishin vetëm profesionistët.
Nëse doni foto sa më “të pastra” dhe reale, mund të çaktivizoni HDR, filtrat e bukurisë dhe optimizimet e skenës. Për foto plotësisht RAW, nevojiten modalitete Pro ose aplikacione të palëve të treta, sidomos në iPhone. /skyweb.al
