Segmenti rrugor “Qafë Thore – Theth” është mbyllur këtë të dielë për shkak të përkeqësimit të kushteve atmosferike.
Policia njofton se është ndaluar qarkullimi i të gjitha automjeteve, përfshirë edhe mjeteve borëpastruese, për shkak të rrezikut të lartë nga ortekët e dëborës. Ky ndalim do të vijojë deri në një njoftim të dytë.
Sipas autoriteteve, vendimi është marrë pas analizës së riskut dhe komunikimit me inxhinierët e firmës kontraktore për mirëmbajtjen e rrugës, si dhe me ARRSH-në. Për shkak të rrezikshmërisë së lartë që paraqet zona, kalimi në këtë segment nuk do të lejohet deri në përmirësimin e situatës.
Segmenti do të mbetet i bllokuar për arsye sigurie, pasi kushtet aktuale paraqesin rrezik serioz për qarkullimin.
Autoritetet u bëjnë thirrje drejtuesve të mjeteve të respektojnë sinjalistikën rrugore, të shmangin këtë aks dhe të ndjekin njoftimet zyrtare për çdo përditësim të ri. /skyweb.al
