Ministrja e Ekonomisë dhe Inovacionit, Delina Ibrahimaj, mbrojti sot sërish projektin Durana Tech Park, skandali i të cilit shpërtheu menjëherë pas atij të AKSHI-t.
Aktorët kryesorë të skemës së parë ishin bërë gati që nga 1 janari të transferonin aktivitetin në letra në Xhafzotaj, për të mos paguar asnjë taksë për paratë e përfituara.
Ngjashëm me përrallën “Rrobat e reja të Mbretit”, ku rrobaqepësi mashtrues i mbushi mendjen Madhërisë dhe oborrit se rrobat ishin magjike dhe mund të mos shiheshin vetëm nga budallenjtë, edhe ministrja Ibrahimaj deklaroi sot se në Durana Tech Park janë aktualisht rezidente 80 kompani.
Në fakt, siç shihet edhe në fotot e siguruara sot nga Skyweb.al, në atë vend ka vetëm bar dhe ndonjë lopë që kullot e pashqetësuar, por jo godina dhe aq më pak struktura që mund të strehojnë kompani të avancuara IT.
Çfarë tha Ibrahimaj:
“Janë 80 rezidentë sot, ku 57 prej tyre kanë kontrata të finalizuara dhe janë rezidentë, ndërsa pjesa tjetër është në proces të avancuar. 52 subjekte janë me kapital të huaj dhe 48 me kapital shqiptar. Kjo është domethënëse sepse tregon interesin ndërkombëtar dhe zhvillimin e sipërmarrjes vendase, që ka qenë që në krye të herës synimi i qeverisë shqiptare”. /skyweb.al
