Në vitin 2024, pensioni mesatar për gratë 65 vjeç e lart në Bashkimin Europian ishte 24.5% më i ulët se ai i burrave.
Sipas të dhënave të publikuara nga Eurostat, diferencat më të mëdha u regjistruan në Maltë (40.3%), Holandë (36.3%) dhe Austri (35.6%). Ndërsa hendeku më i vogël u shënua në Estoni (5.6%), e ndjekur nga Sllovakia (8.4%) dhe Hungaria (9.6%).
Përveç llogaritjeve të bazuara në pensionin mesatar, Eurostat publikon edhe diferencën gjinore duke përdorur vlerën mediane të pensioneve, që është vlera në mes e cila ndan gjysmën e pensioneve më të larta nga gjysma e atyre më të ulëta. Ndryshe nga mesatarja, mediana ndikohet më pak nga një numër i vogël pensionesh shumë të larta ose shumë të ulëta.
Sipas medianës, pensioni i grave në BE ishte 24.9% më i ulët se ai i burrave. Diferencat më të mëdha mediane u regjistruan në Luksemburg (43.3%), Spanjë (41.1%) dhe Holandë (39.6%), ndërsa më të voglat në Estoni (-0.3%), Hungari (0.4%) dhe Danimarkë (2.7%).
Kur krahasohen rezultatet sipas mesatares dhe medianës, dallimet më të mëdha u regjistruan në Danimarkë, ku diferenca sipas mesatares ishte 12.9 pikë përqindje më e lartë se ajo sipas medianës, e ndjekur nga Belgjika (11.0 pikë përqindje) dhe Hungaria (9.2 pikë përqindje).
Ndrëkohë, në disa vende vërehet e kundërta: diferenca sipas medianës ishte më e lartë se ajo sipas mesatares. Diferenca mediane ishte dukshëm më e lartë në Spanjë (-11.9 pikë përqindje), Luksemburg (-10.6 pikë përqindje) dhe Portugali (-6.5 pikë përqindje). /skyweb.al
