Shifrat e aksidenteve rrugore për janarin 2026 tregojnë një rënie të dukshme në numrin e ngjarjeve, por ato nuk tregojnë gjithë historinë e sigurisë rrugore në vend.
Sipas të dhënave zyrtare të INSTAT, në muajin janar janë regjistruar 96 aksidente në të gjithë vendin, me 149 persona të aksidentuar. Krahasuar me janarin e një viti më parë, numri i aksidenteve ka rënë me 23,2%. Në pamje të parë kjo është një zhvillim pozitiv, por një lexim më i thelluar i të dhënave tregon një realitet më kompleks.
149 persona të aksidentuar në vetëm 31 ditë do të thotë mesatarisht mbi katër persona në ditë që përfundojnë të vrarë ose të plagosur në rrugët e Shqipërisë. Megjithatë publikimi mujor nuk bën një ndarje të qartë për muajin konkret se sa prej tyre janë viktima dhe sa janë të plagosur. Në tabelat sipas qarqeve paraqitet vetëm totali “të vdekur dhe të plagosur”, pa një zbërthim të detajuar për secilën kategori.
Kjo mbetet një mangësi e rëndësishme për transparencën publike. Për të kuptuar realisht peshën e fenomenit nuk mjafton numri i aksidenteve, por numri i jetëve të humbura dhe shkalla e plagosjeve. Edhe vetë INSTAT thekson se të dhënat për personat e vdekur janë paraprake dhe mund të rishikohen, çka e bën edhe më të domosdoshme një raportim më të detajuar.
Të dhënat nxjerrin në pah edhe një problem strukturor. 85,4% e aksidenteve kanë ndodhur si pasojë e sjelljes së drejtuesve të mjeteve. Kjo do të thotë se përtej infrastrukturës faktori kryesor mbetet mënyra e drejtimit, shpejtësia, mosrespektimi i rregullave dhe manovrat e rrezikshme. Faktori njeri vazhdon të jetë hallka më e dobët e sigurisë rrugore.
Grupmosha 25 deri në 34 vjeç rezulton më e ekspozuara duke shkaktuar 31,3% të aksidenteve. Kjo është mosha më aktive në tregun e punës dhe në lëvizje, çka do të thotë se aksidentet prekin drejtpërdrejt segmentin më produktiv të shoqërisë, me pasoja që shkojnë përtej statistikës në ekonomi dhe në jetën sociale. /skyweb.al
