Presidenti i Republikës, Bajram Begaj, priti këtë të premte në Presidencë mësues nga Shqipëria, rajoni dhe diaspora, në një ceremoni të organizuar me rastin e 7 Marsit, Ditës së Mësuesit. Aktiviteti u zhvillua si një moment vlerësimi për rolin e arsimtarëve në ruajtjen dhe përcjelljen e gjuhës shqipe dhe të identitetit kombëtar.
Në pritje morën pjesë mësues në pension nga Shqipëria, arsimtarë nga shkollat shqipe në Kosovë, Mal të Zi dhe vende të tjera të rajonit, si edhe mësues që japin mësim në shkollat shqipe të diasporës në shtete të ndryshme të botës.
Në fjalën e tij përshëndetëse, Presidenti Begaj theksoi se 7 Marsi nuk është vetëm një festë simbolike, por një moment reflektimi për rolin që ka arsimi në zhvillimin e vendit.
Ai nënvizoi se sa më shumë investon një shoqëri në arsim, aq më shumë investon në të ardhmen e saj, ndërsa respekti për mësuesit është një tregues i respektit që një komb ka për vetveten dhe për vlerat e tij.
Kreu i Shtetit vlerësoi veçanërisht kontributin e mësuesve që japin mësim në diasporë, duke theksuar se puna e tyre shkon përtej procesit të zakonshëm të mësimdhënies. Sipas tij, ata luajnë një rol të rëndësishëm në ruajtjen e lidhjes shpirtërore të brezave të rinj me gjuhën dhe kulturën shqiptare.
Begaj theksoi se gjuha shqipe nuk është vetëm një mjet komunikimi, por një element thelbësor i identitetit kombëtar, që mbart historinë, kujtesën dhe trashëgiminë kulturore të shqiptarëve.
Në fjalën e tij ai vlerësoi edhe mësuesit veteranë nga Kosova, të cilët gjatë viteve të represionit të regjimit të Sllobodan Millosheviçit mbajtën gjallë arsimin në gjuhën shqipe duke zhvilluar mësimin edhe në ambiente private.
Presidenti theksoi se edhe në kushtet më të vështira një populli mund t’i mbyllen shkollat dhe t’i ndalohen librat, por nuk mund t’i shuhet etja për dije dhe për edukimin e brezit të ri.
Në përfundim të ceremonisë, Begaj u bëri thirrje arsimtarëve të përballen me sfidat e kohës dhe theksoi se arsimi cilësor mbetet një nga sfidat më të mëdha kombëtare.
Ai nënvizoi se mbrojtja dhe zhvillimi i gjuhës shqipe është një projekt që kërkon përfshirjen e të gjithë shoqërisë dhe mbështetje të vazhdueshme institucionale për mësuesit./skyweb.al
