Lëvizja e anijeve në Ngushticën e Hormuzit ka rifilluar pjesërisht, ndërsa Irani ka vendosur kushte të reja për transitin detar, duke kërkuar koordinim të detyrueshëm me autoritetet e tij për të gjitha mjetet që konsiderohen “jo armiqësore”.
Sipas informacionit të shpërndarë për vendet anëtare të Organizatës Ndërkombëtare Detare, Teherani ka sqaruar se anijet që nuk lidhen me SHBA-në, Izraelin apo vendet që mbështesin operacionet kundër Iranit mund të kalojnë, por vetëm përmes një rruge të kontrolluar në ujërat territoriale iraniane dhe pas verifikimit të identitetit.
Pas javësh bllokimi de facto të një prej arterieve më të rëndësishme të tregtisë globale, ku mbetën të bllokuara mijëra anije dhe u goditën dhjetëra të tjera, të dhënat e fundit tregojnë se një numër i kufizuar mjetesh ka nisur të kalojë, duke ulur gradualisht presionin mbi tregjet.
Ky zhvillim ka ndikuar menjëherë në çmimin e naftës, i cili ka shënuar rënie gjatë ditës së sotme. Nafta Brent, që kishte kaluar mbi 100 dollarë për fuçi ditët e fundit, është stabilizuar rreth 98 dollarë për fuçi, ndërsa WTI luhatet në intervalin 90–95 dollarë.
Tregjet reaguan pozitivisht ndaj sinjaleve se nuk do të ketë një bllokim total të Ngushticës së Hormuzit, nga e cila kalon një pjesë e konsiderueshme e naftës globale.
Rihapja e kufizuar e korridorit detar ka ulur frikën për ndërprerje të menjëhershme të furnizimit, duke zbehur presionin mbi çmimet.
Megjithatë, kontrolli i vendosur nga Irani mbi kalimin e anijeve dhe përjashtimi i mjeteve të lidhura me vendet që ai i konsideron armiqësore tregon se situata mbetet e brishtë dhe se Ngushtica e Hormuzit po përdoret si instrument presioni në konfliktin në vijim./skyweb.al
