Spanja ka ndërmarrë një veprim të fortë politik dhe ushtarak ndaj Shteteve të Bashkuara, duke mbyllur hapësirën e saj ajrore për avionët amerikanë të përfshirë në operacionet ushtarake kundër Iranit.
Lajmi është bërë i ditur nga gazeta spanjolle El País, e cila i referohet burimeve ushtarake. Ky vendim vjen pasi Madridi kishte refuzuar më herët përdorimin e bazave të përbashkëta ushtarake në Rota dhe Morón nga ana e SHBA-ve. Sipas raportimeve, ndalimi i hapësirës ajrore nuk zbatohet për rastet emergjente, por i detyron avionët ushtarakë amerikanë të ndryshojnë itinerarin drejt Lindjes së Mesme.
Kryeministri spanjoll, Pedro Sánchez, ka qenë një nga kritikët më të zëshëm të operacioneve ushtarake të SHBA-ve dhe Izraelit kundër Iranit, duke i konsideruar ato të paligjshme dhe të rrezikshme.
“Siç e dini, ne kemi refuzuar përdorimin e bazave në Rota dhe Morón për këtë luftë të paligjshme. Të gjitha planet e fluturimit që lidhen me operacionin në Iran janë refuzuar, përfshirë edhe avionët furnizues me karburant. Nuk ka qenë një vendim i lehtë, por kemi vepruar në përputhje me marrëveshjen dypalëshe që rregullon këto baza. Ne jemi një shtet sovran dhe nuk duam të përfshihemi në luftëra të paligjshme”, deklaroi Sánchez.
Ndërkohë, presidenti amerikan Donald Trump ka paralajmëruar masa ekonomike ndaj Spanjës, duke përfshirë edhe mundësinë e ndërprerjes së marrëdhënieve tregtare, pas refuzimit të Madridit për të lejuar përdorimin e bazave ushtarake. /skyweb.al
