Gjykata e Tiranës ka vendosur pezullimin nga detyra të kreut të Inspektoriatit të Mbrojtjes së Territorit (IMT), Rigers Sheqeri, në kuadër të një hetimi për abuzime të dyshuara me lejet dhe ndërtimet në kryeqytet.
Pezullimi është bërë disa ditë më parë, pas kërkesës së prokurorit Julian Xhengo, i cili ka paraqitur prova dhe dyshime se Sheqeri ka lejuar ndërtime të paligjshme brenda një kompleksi banimi në pronësi të shtetasit P.C.
Ndaj këtij të fundit, gjykata ka vendosur masën e bllokimit të pasaportës, me qëllim parandalimin e largimit nga vendi.
Në të njëjtin vendim, janë shpallur në kërkim edhe dy inspektorë të IMT-së, ndërsa hetimet kanë ngritur dyshime për ekzistencën e një rrjeti të strukturuar brenda institucionit, i cili dyshohet se ka toleruar ose favorizuar ndërtime pa leje.
Ndaj Sheqerit rëndon akuza e shpërdorimit të detyrës, ndërsa hetimet vijojnë të thellohen.
