Dëgjesa publike e thirrur në Martanesh për çështjen e dhënies në përdorim të sipërfaqeve kullosore dhe pyjore përmes ankandit, është kthyer në një protestë të hapur të banorëve kundër planit që, sipas tyre, synon hapjen e rrugës për vendosjen e paneleve fotovoltaike në zonë.
Plas në Gjoricë të Bulqizës, banorët kundër dhënies me qira të kullotave nga bashkia te privatët
Me qindra banorë të mbledhur në takim dhe tensionet e shumta që në nisje, solli që përfaqësuesit e Bashkisë Bulqizë dhe sekretari i Këshillit Bashkiak, Klodian Reçi të largohen. Banorët shprehën zemërim për atë që e konsiderojnë mungesë totale transparence dhe një përpjekje për të vendosur fatin e tokave të përbashkëta pa konsultim me komunitetin.
Shumë prej tyre theksuan se nuk janë kundër investimeve, por kundër prekjes së kullotave dhe zonave që mbajnë gjallë blegtorinë dhe ekonominë familjare. Sipas banorëve, sipërfaqet që po diskutohen janë përdorur prej dekadash nga familjet e Martaneshit, të ndara sipas traditës dhe pa konflikte.
“Nuk duhet të preket asnjë centimetër tokë”, u shprehën disa prej pjesëmarrësve, duke theksuar se kullotat dhe tokat e trashëguara përbëjnë bazën e jetesës për dhjetëra familje që merren me bagëti.
Një nga shqetësimet kryesore të ngritura ishte fakti se, sipas banorëve, nuk ka pasur më parë asnjë dëgjesë të mirëfilltë publike dhe as sqarime konkrete se për çfarë do të përdoren 86 hektarët e përmendur në dokumentet që qarkullojnë. Dyshimet lidhen me mundësinë që këto toka të shfrytëzohen për sisteme fotovoltaike, çka sipas tyre do të sillte rrethimin e kullotave dhe daljen e tyre jashtë përdorimit për komunitetin.
Në rastin e Martaneshit, Bashkia e Bulqizës ka zhvilluar në fillim të vitit 2026 një ankand për dhënien në përdorim të 85.9 hektarëve nga fondi pyjor dhe kullosor në fshatin Melcu, me qëllim ndërtimin e aerogjeneratorëve dhe instalimin e paneleve fotovoltaike. Procedura u shpall në fund të dhjetorit 2025 dhe u zhvillua më 26 janar 2026, ku mori pjesë vetëm një operator ekonomik, kompania “ALB-ML Solar Energy Investment” sh.p.k., e cila u shpall fituese me një ofertë prej 11,467,600 lekësh në vit.
Përtej sipërfaqes prej 85.9 hektarësh të shpallur tashmë në ankand në Melcu, banorët e Martaneshit shprehen se dyshojnë për një plan më të gjerë që mund të përfshijë edhe qindra hektarë të tjerë në zonë.
Një tjetër shqetësim i ngritur nga banorët e Martaneshit lidhet me dyshimet se pas interesit për këto sipërfaqe qëndrojnë individë që ata i konsiderojnë të afërt me Partinë Socialiste dhe strukturat e pushtetit vendor e qendror. Kjo linjë u përforcua edhe nga deputetja e Partisë Demokratike, Denisa Vata, e cila gjatë pranisë së saj në dëgjesë deklaroi se tokat po synohen nga firma dhe eksponentë të lidhur me pushtetin, me qëllim ndërtimin e paneleve fotovoltaike. Sipas saj, procesi po zhvillohet pa dëgjuar komunitetin dhe përfaqëson një tjetër goditje ndaj pasurive që banorët i kanë përdorur ndër breza.
Banorë të tjerë kërkuan që, nëse ka investime për energji diellore, ato të orientohen në zona të lira malore dhe jo në hapësirat që shërbejnë për stanet dhe bagëtitë. Sipas tyre, fusha pranë qytetit të Krastës dhe zonat përreth janë thelbësore për blegtorinë dhe përdorimin e përditshëm.
Ata paralajmëruan se mungesa e sqarimeve mund të krijojë konflikte serioze sociale, pasi shumë familje kanë nisur të rikthehen te blegtoria dhe përdorimi i kullotave.
Reagimi i sotëm në Martanesh vjen në një moment kur debate të ngjashme po zhvillohen edhe në zona të tjera të Bashkisë Bulqizë. Vetëm disa ditë më parë, edhe në Lejçan të Ostrenit dhe Gjoricë, dëgjesat publike u shoqërua me kundërshti të forta nga banorët ndaj planeve për dhënien në përdorim të sipërfaqeve pyjore dhe kullosore.
Kjo me të njëjtin shqetësim: frikën se pas ankandeve për tokat fshihet synimi për projekte fotovoltaike që do të nxirrnin jashtë funksionit kullotat tradicionale dhe do të dëmtonin drejtpërdrejt ekonominë familjare. /bulqizaime.al
