Organizata e vendeve eksportuese të naftës dhe aleatët e saj, OPEC+, pritet të vendosin për një tjetër rritje të prodhimit në takimin e së dielës, në një kohë kur tregu global i naftës po përballet me tronditje të forta nga kriza në Lindjen e Mesme.
Pas një vendimi të mëparshëm për të rritur prodhimin me 206 mijë fuçi në ditë për muajin prill, prodhuesit kryesorë po shqyrtojnë shtimin e mëtejshëm të furnizimit, në përpjekje për të stabilizuar tregun.
Por situata në terren mbetet e ndërlikuar. Lufta SHBA-Izrael me Iranin ka çuar në ndërprerjen më të madhe të furnizimit me naftë të regjistruar ndonjëherë, ndërsa mbyllja e Ngushticës së Hormuzit, nga ku kalon mbi 20% e naftës globale, ka detyruar vende si Arabia Saudite, Iraku, Kuvajti dhe Emiratet e Bashkuara Arabe të ulin prodhimin.
Si pasojë, çmimet e naftës bruto janë ngjitur në rreth 120 dollarë për fuçi, niveli më i lartë në katër vitet e fundit, ndërkohë që edhe prodhimi rus është goditur nga sulmet me dronë.
Në këtë kontekst, burime brenda OPEC+ bëjnë me dije se rritja e prodhimit që mund të miratohet në takimin e së dielës do të ketë më shumë efekt sinjalizues sesa ndikim të menjëhershëm në treg.
Kjo pasi, pa rihapjen e Hormuzit, shtimi real i furnizimit mbetet i kufizuar, ndërsa kapacitetet alternative të eksportit janë pranë limiteve. Arabia Saudite, për shembull, ka rritur eksportet përmes portit Yanbu në Detin e Kuq në rreth 4.6 milionë fuçi në ditë, afër kapacitetit maksimal.
Ndërkohë, vende të tjera si Rusia, Kazakistani, Algjeria dhe Omani nuk preken drejtpërdrejt nga bllokimi, por kanë mundësi të kufizuara për të rritur prodhimin në afat të shkurtër.
Kjo do të thotë se edhe nëse OPEC+ vendos të hapë rubinetin e naftës, ndikimi në çmimet e karburanteve për konsumatorët mund të jetë i kufizuar dhe i vonuar.
Në praktikë, tregu mbetet i varur nga zhvillimet gjeopolitike, dhe sidomos nga rihapja e Ngushticës së Hormuzit, pa të cilën çdo vendim për rritje prodhimi rrezikon të mbetet vetëm në letër. /skyweb.al
