Shqipëria dhe Kosova pritet të thellojnë bashkëpunimin në industrinë e mbrojtjes, duke përfshirë bashkëprodhimin dhe blerjet e përbashkëta të pajisjeve ushtarake. Ky ishte mesazhi që dolën nga takimi i zhvilluar në Prishtinë mes ministrave të Mbrojtjes, Ermal Nufi dhe Ejup Maqedonci.
Ministri kosovar i Mbrojtjes, Ejup Maqedonci, bëri të ditur se dy vendet janë në fazë identifikimi të mundësive konkrete për bashkëpunim në këtë sektor, duke e cilësuar industrinë e mbrojtjes si një fushë strategjike në kushtet aktuale të sigurisë. Ai theksoi se tashmë është nënshkruar një kontratë për ndërtimin e një fabrike për prodhimin e municioneve, ndërsa paralelisht po zhvillohen diskutime me partnerë të tjerë për projekte bashkëprodhimi.
Sipas autoriteteve në Prishtinë, fabrika do të ndërtohet në Jahoc të Gjakovës dhe prodhimi i parë pritet të nisë në fund të vitit 2026, duke shënuar një hap konkret drejt rritjes së kapaciteteve vendase në sektorin e mbrojtjes.
Nga ana tjetër, ministri shqiptar i Mbrojtjes, Ermal Nufi, rikonfirmoi mbështetjen e Shqipërisë për Kosovën në aspektin e sigurisë, duke theksuar se situata në Kosovë konsiderohet drejtpërdrejt si çështje sigurie edhe për Shqipërinë. Ai bëri të ditur se në takimet me përfaqësues të NATO-s dhe strukturave ndërkombëtare, është konfirmuar se nuk ka ndryshime në planet e angazhimit të KFOR-it në Kosovë.
Në të njëjtën kohë, Nufi theksoi se Shqipëria ka ngritur shqetësimet për zhvillimet në rajon, duke përfshirë edhe dinamikat e armatimit. I pyetur për furnizimin e Serbisë me armë kineze, ai u shpreh se kjo mbetet një çështje që i takon politikave të brendshme të Serbisë në raport me doktrinën e saj të sigurisë.
Zhvillimet vijnë në një moment kur tensionet në rajon mbeten të pranishme. Vetëm pak ditë më parë, presidenti serb Aleksandar Vuçiç deklaroi se Serbia do të vijojë të forcojë kapacitetet ushtarake, duke përmendur presione nga vendet fqinje.
Thellimi i bashkëpunimit mes Shqipërisë dhe Kosovës në industrinë e mbrojtjes shihet si një lëvizje që synon rritjen e autonomisë dhe kapaciteteve në një sektor gjithnjë e më të rëndësishëm në kontekstin aktual gjeopolitik. /skyweb.al
