Aeroporti Ndërkombëtar i Tiranës vijon të përballet me një fluks të lartë lëvizjesh në këtë periudhë të sezonit veror.
Gjatë 24 orëve të fundit, në Rinas janë regjistruar 45.560 pasagjerë, një shifër që tregon intensitetin e lartë të trafikut ajror dhe rritjen e ndjeshme të lëvizjeve në hyrje dhe dalje të vendit.
Përballimi i këtij fluksi lidhet edhe me investimet e konsiderueshme që janë kryer vitet e fundit në drejtim të zgjerimit të kapaciteteve dhe lehtësimit të kalimit të udhëtarëve.
Pjesë e këtyre investimeve janë edhe pajisjet moderne të kontrollit dhe skanerët e teknologjisë së fundit, të cilët kanë ndihmuar në përshpejtimin e procedurave dhe në rritjen e sigurisë.
Sipas Doganës së Rinasit, strukturat doganore mbeten të angazhuara për të garantuar një shërbim sa më efikas për udhëtarët, si edhe për zbatimin e procedurave doganore në kushtet e një ngarkese të shtuar.
Autoritetet theksojnë se synimi është lehtësimi i kalimit të pasagjerëve, duke ruajtur njëkohësisht standardet e kontrollit dhe sigurisë në aeroport.
