Grupi Salillari është shpallur fitues i procedurës për ndërtimin e autostradës Milot Balldren, një nga segmentet më të rëndësishme të Korridorit Adriatiko Jonian dhe një prej projekteve strategjike të infrastrukturës rrugore në vend.
Vendimi i hap rrugë një projekti të shumëdiskutuar prej vitesh, i cili ka kaluar disa tentativa të mëparshme pa arritur të hyjë në fazën e zbatimit.
Salillari është një nga kompanitë më të mëdha të ndërtimit në Shqipëri dhe një emër i njohur në sektorin e infrastrukturës rrugore. Aktiviteti i saj përfshin ndërtimin e rrugëve, urave, tuneleve, veprave hidroteknike, aeroporteve, porteve dhe projekteve të tjera të infrastrukturës strategjike. Në vite, kompania ka marrë pjesë në realizimin e disa prej investimeve më të rëndësishme publike në vend.
Ministri i Infrastrukturës, Enea Karakaçi, tha në një dalje për mediat se procedura nuk ka qenë e lehtë, për shkak të historikut të mëparshëm të projektit dhe tentativave që nuk kanë rezultuar të suksesshme.
“Procedura nuk ka qenë e lehtë, sepse ka pasur tentativa të mëparshme që kanë rezultuar jo të suksesshme. Megjithatë, me përkushtim dhe profesionalizëm, ia kemi dalë që sot të shpallim një fitues, duke bërë të mundur përfundimisht ndërtimin e kësaj vepre”, u shpreh Karakaçi.
Projekti Milot Balldren ka një histori të gjatë. Një procedurë e mëparshme koncesionare, e nisur në vitin 2018, nuk arriti të finalizohej për shkak të problemeve me sigurimin e financimit. Kjo bëri që projekti të rikthehej nga e para dhe të mbetej për vite me radhë një nga veprat më të vështira për t’u çuar drejt zbatimit.
Me përfundimin e procedurës së përzgjedhjes së fituesit, projekti pritet të kalojë në fazën e nënshkrimit të kontratës dhe më pas në përgatitjet për nisjen e punimeve.
Segmenti Milot Balldren ka një gjatësi prej rreth 17 kilometrash dhe konsiderohet një hallkë kyçe për lidhjen e autostradës Thumanë Milot me aksin Balldren Muriqan. Ky segment është pjesë e Korridorit Blu, një prej projekteve më të rëndësishme infrastrukturore për lidhjen e Shqipërisë me rajonin dhe rrjetet europiane të transportit.
Projekti parashikon ndërtimin e një autostrade me standarde europiane, me dy karrexhata, korsi emergjence, ura, nënkalime dhe vepra të tjera arti. Qëllimi është përmirësimi i lëvizjes në veri të vendit, rritja e sigurisë rrugore dhe krijimi i një lidhjeje më të shpejtë me Lezhën, Shkodrën dhe Malin e Zi.
Autostrada Milot Balldren pritet të reduktojë kohën e udhëtimit, të lehtësojë qarkullimin në një prej akseve më të rëndësishme të vendit dhe të mbështesë zhvillimin ekonomik të zonave që lidhen me këtë korridor.
Sipas planifikimeve të qeverisë, ky segment është një nga pjesët kryesore për përfundimin e Korridorit Blu, i cili synon të transformojë lidhjet rrugore të Shqipërisë me rajonin dhe Bashkimin Europian.
