Gjenet e lidhura me rezistencën ndaj antibiotikëve janë të pranishme në disa pellgje oqeanike në mbarë botën, përfshirë ujërat e largëta dhe të izoluara, sipas gjetjeve të publikuara të hënën nga një projekt kërkimor i udhëhequr nga Italia, i cili analizoi mostra të ujit të detit nga e gjithë bota, shkruan Reuters.
Projekti SeA Care zbuloi gjene të rezistencës ndaj antibiotikëve në Mesdhe, Atlantik, Arktik dhe rajone të tjera, me përqendrime më të larta të identifikuara pranë rrugëve të ngarkuara detare dhe zonave bregdetare me dendësi të lartë popullsie. Sipas studiuesve, rezultatet sugjerojnë se oqeanet veprojnë si një rezervuar global i ndotjes që vjen nga toka, duke transportuar gjurmë gjenetike të përdorimit të antibiotikëve dhe shkarkimeve urbane shumë larg burimit të tyre.
Kjo, nga ana tjetër, mund të lehtësojë përhapjen e tyre edhe në komunitete të largëta, shtuan studiuesit.
Studimi, i paraqitur të hënën në një forum mbi shëndetin e oqeanit dhe të njeriut në Romë, i organizuar nga Instituti Kombëtar Italian i Shëndetit (ISS), zbuloi gjithashtu mikroplastikë, kimikate PFAS të njohura si “kimikate të përhershme” dhe gjurmë të materialit gjenetik të SARS-CoV-2 edhe në ujërat e hapura të oqeanit dhe në rajone të largëta.
“Mbrotja e shëndetit të njerëzve sot do të thotë në mënyrë të pashmangshme të kujdesemi për detet dhe oqeanet,” tha Andrea Piccioli, Drejtori i Përgjithshëm i ISS, duke shtuar se ndotësit e çliruar në mjedis rishpërndahen globalisht përmes sistemeve të ujit, ushqimit dhe klimës.
SeA Care është një nismë e udhëhequr nga Italia që lidh shëndetin mjedisor me shëndetin e njeriut. Ajo bashkon institucione, përfshirë Istituto Superiore di Sanità, Italian Navy dhe qendra ndërkombëtare kërkimore, me qëllim krijimin e një sistemi global monitorimi të oqeaneve.
Projekti përdor rrugët ekzistuese detare dhe rrjetet shkencore për të mbledhur mostra gjatë misioneve rutinë, duke ulur kostot dhe ndikimin mjedisor.
Gjatë tre viteve të para, u mblodhën më shumë se 4,000 mostra të ujit të detit në mbi 140 lokacione në Mesdhe, Oqeanin Atlantik, Paqësor, Arktik dhe Indian.
Shkencëtarët thonë se projekti tregon se si oqeanet mund të shërbejnë si një sistem paralajmërimi i hershëm për rreziqet globale ndaj shëndetit, duke mbështetur politika që synojnë luftimin e ndotjes, ndryshimeve klimatike dhe kërcënimeve të reja për shëndetin e njerëzve. /skyweb.al
