Mes maleve të egra, fshatrave me trashëgimi kulturore, plazheve me ujëra të kristalta dhe tryezave të pasura tradicionale, Shqipëria po shndërrohet në një nga destinacionet më tërheqëse dhe intriguese të Evropës, shkruan Noemie Adler në një artikull të botuar në median franceze “Le Guide du Routard”.
Ende e paprekur nga turizmi masiv, vendi ofron një mozaik peizazhesh, kulturash dhe traditash, të cilat prezantohen në mënyrë të detajuar në edicionin e ri të udhërrëfyesit te njohur francez “Le Routard”.
Përmes itinerareve të sugjeruara, adresave të rekomanduara dhe këshillave praktike, udhërrëfyesi synon t’u ofrojë turistëve një përvojë autentike dhe sa më pranë realitetit lokal.
Shqipëria mes natyrës, kulturës dhe cilësisë së jetës
Nga kryeqyteti i Tiranës deri në skajet jugore të vendit, udhërrëfyesi paraqet një Shqipëri dinamike dhe në zhvillim, ku historia dhe moderniteti bashkëjetojnë natyrshëm.
Vizitorët mund të zbulojnë monumente të rëndësishme historike, një jetë urbane në transformim të vazhdueshëm dhe një kulturë lokale të rrënjosur fort në tradita.
Një vëmendje e veçantë i kushtohet mikpritjes shqiptare, e njohur gjerësisht nga vizitorët e huaj, si dhe gastronomisë vendase, e cila ndërthur ndikimet mesdhetare dhe ballkanike.
Megjithatë, sipas udhërrëfyesit, forca më e madhe e Shqipërisë qëndron te natyra e saj.
Liqenet e lashta, relievi malor dhe bregdeti prej më shumë se 400 kilometrash krijojnë një panoramë mbresëlënëse.
Nga veriu në jug, çdo ndalesë ofron mundësinë për të ngadalësuar ritmin, për të vëzhguar dhe për të shijuar një mjedis natyror ende të ruajtur.
Pikat kryesore turistike të rekomanduara nga udhërrëfyesi
Mes përvojave që “Le Routard” rekomandon për vizitorët në Shqipëri janë:
• Ngjitja në Piramidën e Tiranës për të shijuar pamjen e kryeqytetit nga lart;
• Vizita në Xhaminë e Et’hem Beut, një nga monumentet më të bukura të Tiranës;
• Momente relaksi në Rivierën Shqiptare, e njohur për plazhet dhe ujërat e saj të kthjellëta;
• Eksplorimi i zonave përreth Liqenit të Ohrit, veçanërisht në Lin dhe Pogradec;
• Një ditë kushtuar gastronomisë në Përmet, i konsideruar si kryeqyteti shqiptar i lëvizjes “slow food”.
Me këtë udhërrëfyes të ri, “Le Routard” e paraqet Shqipërinë si një destinacion që kombinon natyrën e paprekur, trashëgiminë kulturore dhe përvojat autentike, duke e pozicionuar vendin mes zgjedhjeve më interesante, për turistët evropianë në kërkim të destinacioneve të reja.
