Shqipëria po krijon që tani bazën ligjore për kalimin e ardhshëm nga Leku te euro dhe për përfshirjen e Bankës së Shqipërisë në sistemin monetar të Bashkimit Evropian.
Projektligji i ri “Për Bankën e Shqipërisë” parashikon rregulla të posaçme që do të zbatohen pas anëtarësimit të vendit në BE dhe më pas pas adoptimit të euros si monedhë zyrtare.
Ligji i ri i hap rrugën Leku-t digjital, Banka e Shqipërisë ka të drejtën ekskluzive të emetimit
Me hyrjen e Shqipërisë në Bashkimin Evropian, Banka e Shqipërisë do të bëhet pjesë e Sistemit Evropian të Bankave Qendrore. Në një fazë të mëvonshme, kur vendi të plotësojë kushtet për euron, ajo do të përfshihet në Eurosistem dhe do të zbatojë vendimet e Bankës Qendrore Evropiane.
Kjo do të thotë se politika monetare, normat bazë të interesit dhe administrimi i monedhës nuk do të përcaktohen më vetëm nga Banka e Shqipërisë, por në kuadër të politikës së përbashkët të BQE-së.
Projektligji parashikon gjithashtu pjesëmarrjen e Bankës së Shqipërisë në kapitalin e Bankës Qendrore Evropiane dhe mundësinë e transferimit të një pjese të rezervave valutore në institucionin evropian.
Ligji i ri forcon ndërkohë pavarësinë e Bankës së Shqipërisë dhe ndalon financimin e drejtpërdrejtë të qeverisë, bashkive dhe institucioneve të tjera publike. Këto janë kërkesa të BE-së për vendet që synojnë të hyjnë në sistemin monetar evropian.
Megjithatë, kalimi në euro nuk do të ndodhë menjëherë me miratimin e ligjit. Shqipëria duhet fillimisht të anëtarësohet në BE dhe më pas të përmbushë kriteret ekonomike dhe monetare për adoptimin e monedhës së përbashkët.
Deri atëherë, Leku do të mbetet monedha zyrtare dhe Banka e Shqipërisë do të vazhdojë të përcaktojë politikën monetare të vendit.
Projektligji synon që kuadri ligjor shqiptar të jetë gati paraprakisht, në mënyrë që Banka e Shqipërisë të mund të integrohet gradualisht në strukturat e Bankës Qendrore Evropiane.
