Është ora katër e mëngjesit dhe një mjeke e re vazhdon turnin e natës. Edhe pse është shumë e lodhur, kur kthehet në shtëpi nuk arrin të flejë lehtë, sepse ora biologjike e trupit të saj i sinjalizon se është koha për t’u zgjuar. Ky është një problem që prek miliona punëtorë të turneve të natës, si infermierë, shoferë, policë dhe punëtorë fabrikash, sipas BBC.
Shkencëtarët kanë zbuluar se gjumi është thelbësor për shëndetin. Gjatë tij, truri ruan kujtimet, përpunon emocionet, riparon trupin dhe pastron mbetjet e dëmshme përmes sistemit glinfatik. Kur gjumi prishet vazhdimisht, këto procese nuk funksionojnë si duhet.
Studimet tregojnë se puna me turne nate lidhet me rrezik më të lartë për sëmundje të zemrës, diabet, goditje në tru, disa lloje kanceri dhe mund të rrisë edhe rrezikun e demencës. Mungesa e gjumit rrit hormonin e stresit (kortizolin), inflamacionin në trup dhe çrregullon ritmin normal biologjik.
Megjithatë, studiuesit po kërkojnë mënyra për të zvogëluar këto pasoja. Një ide premtuese është gjumi dypjesësh (biphasic sleep): në vend që punëtorët e natës të përpiqen të flenë disa orë rresht gjatë ditës, mund të jetë më efektive të flenë në dy periudha, për shembull disa orë në mëngjes dhe disa të tjera pasdite. Gjithashtu, dremitjet e shkurtra (20–50 minuta) gjatë ose pas turnit mund të përmirësojnë përqendrimin dhe të ulin lodhjen.
Puna me turne nate nuk mund të shmanget për shumë profesione, por kërkimet sugjerojnë se përshtatja e mënyrës së gjumit me ritmin natyror të trupit mund të ndihmojë në mbrojtjen e shëndetit dhe përmirësimin e mirëqenies së punëtorëve. /skyweb.al
