Kostoja e ndërtimit të banesave vijoi të rritet edhe në tremujorin e dytë të vitit 2026, por presioni kryesor këtë herë nuk erdhi nga materialet, por nga pagat e punonjësve.
Sipas të dhënave të INSTAT, Indeksi i Kushtimit në Ndërtim arriti në 114.7 pikë, duke shënuar një rritje vjetore prej 1.1%.
Rritjen më të fortë e regjistruan shpenzimet për paga, të cilat u rritën me 4.3% krahasuar me të njëjtën periudhë të një viti më parë. Në të njëjtën kohë, “kosto të tjera” u rritën me 3%, shpenzimet e transportit me 1.5% dhe ato për makineri me 1.2%.
Në kahun e kundërt lëvizën materialet. Shpenzimet për materiale ranë me 0.6%, ndërsa vetëm materialet e ndërtimit shënuan një ulje prej 0.9%.
Kjo tregon se për ndërtuesit presioni mbi kostot po zhvendoset gjithnjë e më shumë nga çmimi i tullave, çimentos apo materialeve të tjera, te fuqia punëtore.
E njëjta tendencë u pa edhe në krahasim me tremujorin e parë të këtij viti. Shpenzimet për paga u rritën me 1.1% në vetëm tre muaj, ndërsa vetë indeksi total i kostos së ndërtimit u rrit me 0.3%.
Të dhënat sinjalizojnë se mungesa e fuqisë punëtore dhe rritja e pagave po kthehen në një nga kostot kryesore për kompanitë e ndërtimit, ndërsa materialet nuk po ushtrojnë më të njëjtin presion si në vitet e mëparshme. /skyweb.al
