Deklaratat e pasurisë për vitin 2025 zbulojnë një panoramë të gjerë të të ardhurave të familjarëve të anëtarëve të kabinetit qeveritar, nga pagat në administratë dhe kompanitë private, deri te bordet, qiratë dhe honoraret.
Bashkëshorti i zëvendëskryeministres Albana Koçiu, Arbër Misja, ka deklaruar rreth 26,710 euro: 21,638 euro pagë nga Drejtoria e Përgjithshme e Doganave dhe 5,072 euro nga këshilli drejtues i Shtypshkronjës së Letrave me Vlerë.
Ana Malaj, bashkëshortja e ministrit të Financave Petrit Malaj, ka përfituar 60,305 euro pagë vjetore nga kompania e shërbimeve financiare CRIF SPA.
Të ardhurat më të larta rezultojnë në familjen e ministrit të Turizmit, Blendi Gonxhja. Bashkëshortja e tij, Elda Gonxhja, ka deklaruar 51 mijë euro nga qiraja dhe 37,104 euro pagë nga Albarent, ose rreth 88,104 euro gjithsej. Djali, Dante Gonxhja, ka marrë 41,544 euro pagë nga e njëjta kompani.
Bashkëshorti i ministres së Arsimit Mirela Kumbaro, Aleksandër Furxhi, ka deklaruar 36 mijë euro nga kontratat dhe honoraret me Media Vizion. Vajza, Sara Furxhi, ka siguruar 11,936 euro nga tri kompani, ndërsa djali Tom Furxhi ka marrë 14,634 euro pagë nga Agjencia e Industrisë së Mbrojtjes.
Në familjen e ministres së Shëndetësisë Klodiana Spahiu, bashkëshorti Eduard Spahiu ka deklaruar rreth 30,076 euro nga aktiviteti privat, Spitali Rajonal Durrës, Universiteti Katolik “Zonja e Këshillit të Mirë” dhe burime të tjera. Vajza Dea Spahiu ka përfituar rreth 24,300 euro nga dy klinika në Gjermani.
Lisarta Nufi, bashkëshortja e ministrit të Mbrojtjes Ermal Nufi, ka deklaruar rreth 23,505 euro nga KESH, bordi i Sena Solar Energy Albania dhe Avokatura e Shtetit.
Djali i ministrit të Jashtëm Ferit Hoxha, Maximilien Nèmo Kastriot Hoxha, ka deklaruar 32,415 euro pagë nga kompania ndërkombëtare Wavestone. Djali tjetër, Gabriel Lèo Paul Ferit Hoxha, rezulton me rreth 500 euro në llogari bankare.
Ndërsa Anisa Pashaj, bashkëjetuesja e ministrit të Brendshëm Besfort Lamallari, ka deklaruar 10,266 euro pagë nga Agjencia e Menaxhimit të Burimeve Ujore.
Rasti më i pazakontë është ai i familjes së ministrit të Drejtësisë, Toni Gogu. Bashkëshortja e tij ka deklaruar 11,382 euro, ndërsa vajza 10,191 euro pagë nga Deloitte Albania.
Djali i ministrit, Teojorg Gogu, ka deklaruar vetëm rreth 2,877 euro të ardhura nga paga dhe bursa, por njëkohësisht rezulton me një detyrim financiar prej 50 mijë eurosh.
Në deklaratat e pasurisë nuk figurojnë bashkëshortë apo bashkëjetues për Delina Ibrahimajn, Adea Pirdenin, Andis Sallën, Sofjan Jaupajn, Majlinda Dhukën, Ervin Demon dhe Erjona Ismailin. Mungesa e tyre në formularë nuk provon domosdoshmërisht mungesën e një partneri, por vetëm se nuk është deklaruar një marrëdhënie që krijon detyrim raportimi financiar. /Marrë me shkurtime nga vna.al
