Shqipëria vijon të konsolidohet si një destinacion i preferuar turistik, jo vetëm për plazhet dhe peizazhet malore, por edhe për pasurinë e saj kulturore dhe historike.
Gjatë tetë muajve të parë të vitit 2026, sitet dhe institucionet e trashëgimisë kulturore kanë regjistruar një rritje të ndjeshme të numrit të vizitorëve vendas dhe të huaj.
Ministri i Turizmit, Kulturës dhe Sportit, Blendi Gonxhja, bëri të ditur se në periudhën janar-gusht 2026, sitet kulturore në vend u vizituan nga 1,062,067 persona.
Sipas Gonxhjas, kjo shifër përfaqëson një rritje prej 65% krahasuar me të njëjtën periudhë të vitit 2023. Numri i vizitorëve është rritur gjithashtu me 21.3% krahasuar me vitin 2024 dhe me 5% në raport me vitin 2025.
Parqet Arkeologjike kryesuan me 448,711 vizitorë, ndërsa në Kala dhe Monumente Kulture u regjistruan 312,220 vizitorë. Muzetë Kombëtarë pritën 301,136 vizitorë gjatë kësaj periudhe.
Sa i përket siteve më të frekuentuara, në krye renditet Kalaja e Gjirokastrës me 223,280 vizitorë, e ndjekur nga Parku Kombëtar i Butrintit me 204,867 vizitorë.
Në Parkun Arkeologjik të Shkodrës u regjistruan 135,293 vizitorë, ndërsa Muzeu “Gjergj Kastrioti Skënderbeu” në Krujë tërhoqi 104,128 vizitorë.
Ndërkohë, Parku Arkeologjik i Apolonisë u vizitua nga 91,764 persona, ndërsa Muzeu Ikonografik “Onufri” në Berat regjistroi 70,143 vizitorë gjatë muajve janar-gusht.
Të dhënat tregojnë një interes në rritje për trashëgiminë kulturore shqiptare, duke i dhënë historisë, monumenteve dhe pasurive arkeologjike një rol gjithnjë e më të rëndësishëm në zhvillimin e ofertës turistike të Shqipërisë.
