Kryeministri Edi Rama ka dalë në mbrojtje të zv.kryeministres Belinda Balluku duke deklaruar se materiali i paraqitur nga Prokuroria e Posaçme në fakt është e gjithë arkiva e MIE-s, prandaj edhe duket si dosje voluminoze me 16 mijë faqe.
Ai tha se materiali USB nuk është vënë në dispozicion as të deputetëve të Partisë Socialiste dhe as të avokatëve të ministres.
Duke folur për çështjen e mandatit të Ballukut, Rama theksoi se provat e dorëzuara në Kuvend nga SPAK përfshijnë praktikisht të gjithë arkivën e Ministrisë së Infrastrukturës dhe Energjisë.
Sipas tij, prokurorët kanë marrë dokumentacionin e plotë të institucionit, duke përfshirë rreth 16 mijë faqe, të cilat janë futur në dosjen hetimore.
Kreu i qeverisë sqaroi se materiali i sjellë nga SPAK në formë USB-je nuk është tërhequr nga asnjë deputet i mazhorancës, as nga vetë ministrja Balluku dhe as nga avokatët e saj. Rama tha se kjo është bërë me qëllim që të mos krijohet asnjë dyshim apo pretendim se dokumentet janë manipuluar apo nxjerrë nga palë të treta.
Sipas Ramës, rasti i Ballukut është trajtuar fillimisht edhe në raport me pushtetin ekzekutiv, pasi SPAK ka paraqitur një kërkesë për pezullim, përpara se çështja të shkonte në Kuvend. Kryeministri e cilësoi këtë si një situatë të pazakontë, duke deklaruar se në asnjë vend të botës nuk ndodh që një anëtar qeverie të përfshihet “brutalisht” në territorin e pushtetit ekzekutiv përpara se çështja të trajtohet në parlament.
Ai shtoi se qeveria ka mbajtur një qëndrim institucional, duke e çuar çështjen për interpretim në Gjykatën Kushtetuese, për të respektuar ndarjen e pushteteve dhe procedurat ligjore.
Rama u shpreh se SPAK nuk është opozita e qeverisë, por një institucion i pavarur i drejtësisë, ndërsa theksoi se edhe në rastet kur Prokuroria e Posaçme kërkon heqjen e imunitetit të zyrtarëve, mazhoranca do të mbajë një qëndrim korrekt dhe në përputhje me Kushtetutën.
Në përfundim, kryeministri theksoi se nuk ka pasur ndryshim qëndrimi nga ana e qeverisë, por një reagim të matur dhe institucional, duke nënvizuar se rasti Balluku po trajtohet në përputhje me rregullat e shtetit të së drejtës.
