Si pasojë e rritjes së ndjeshme të prurjeve ujore, në kaskadën e Drinit kanë nisur shkarkimet e kontrolluara nga hidrocentralet e Komanit dhe Vaut të Dejës. Aktualisht, nga këto dy vepra energjetike po shkarkohet një sasi prej rreth 700 metra kub ujë në sekondë.
Sipas burimeve zyrtare, shkarkimet po kryhen në mënyrë të kontrolluar dhe të koordinuar, paralelisht me prodhimin e energjisë elektrike. Procesi po monitorohet në kohë reale nga specialistët e hidrocentraleve, me qëllim garantimin e sigurisë së digave dhe menaxhimin e situatës hidrike.
Autoritetet bëjnë me dije se shkarkimet janë pjesë e protokolleve teknike për përballimin e rritjes së prurjeve dhe se situata po ndiqet nga afër, për të shmangur çdo rrezik të mundshëm në zonat përreth. /skyweb.al
