Një situatë kaotike dhe me tension të lartë është regjistruar në orët e para të mëngjesit në aeroportin e Brindisit, ku rreth 400 pasagjerë të dy fluturimeve të Wizz Air kanë pushtuar pistën e avionëve në shenjë proteste.
Bëhet fjalë për dy fluturime që ishin nisur nga Bologna dhe Bergamo me destinacion Tiranën, por që u detyruan të devijonin drejt Brindisit për shkak të kushteve të rënda të motit në Rinas. Avionët nuk mundën të ulen në Rinas pasi kushtet e motit ishin të papërshtatshme.
Ajo që fillimisht u komunikua si një ndalesë emegjernce të dy avionëve të Wizz Air në Brindisi, u shndërrua më pas në një situatë të pakontrolluar.
Sipas mediave italiane, pasagjerët kanë mbetur për orë të tëra pa asnjë informacion të qartë dhe pa asistencë nga kompania ajrore Wizz Air për vazhdimin e udhëtimit apo sistemimin e tyre.
Rreth orës 07:00 të mëngjesit, tensioni ka arritur kulmin, ndërsa një pjesë e pasagjerëve kanë thyer kordonët e sigurisë dhe kanë hyrë në zonën operative të aeroportit, duke pushtuar pistën.
Situata ka detyruar ndërhyrjen e menjëhershme të policisë së kufirit dhe forcave të rendit, të cilat kanë rrethuar zonën për të garantuar sigurinë dhe për të larguar civilët nga pista.
Për disa orë, aeroporti i Brindisit ka qenë praktikisht i bllokuar, me fluturime të tjera të pezulluara për arsye sigurie.
Sipas burimeve lokale, po punohet për gjetjen e një zgjidhjeje alternative për pasagjerët e bllokuar. Një nga opsionet që po diskutohet është organizimi i një lundrimi detar nga Brindisi drejt Vlorës, por realizimi i tij varet nga numri minimal i pasagjerëve që duhet të imbarkohen.
Ndërkohë, situata e rreth 400 udhëtarëve mbetet e fragmentuar. Një pjesë e tyre janë sistemuar përkohësisht në struktura hoteliere në Brindisi, ndërsa të tjerë janë nisur me autobusë drejt Italisë së Veriut. Forcat e rendit vijojnë të qëndrojnë në gatishmëri për të shmangur përshkallëzim të mëtejshëm të protestës.
Deri në këto momente, Wizz Air nuk ka dhënë një njoftim zyrtar për mënyrën e vijimit të udhëtimit apo për kompensimin e pasagjerëve, ndërsa ngjarja ka ngritur sërish pikëpyetje mbi menaxhimin e emergjencave dhe asistencën ndaj udhëtarëve në rastet e devijimeve të fluturimeve. /skyweb.al
