Gjithnjë e më shumë shqiptarë po përdorin aplikacionet bankare për të kryer pagesa dhe transferta. Sipas të dhënave të fundit të Bankës së Shqipërisë, në janar dhe shkurt të këtij viti janë regjistruar rreth 1.6 milionë transaksione nëpërmjet home banking, me një rritje prej 22.5% krahasuar me të njëjtën periudhë të një viti më parë.
Kjo rritje në numër ka sjellë edhe një zgjerim të vlerës së veprimeve financiare, me një rritje prej 21.2%. Megjithatë, të dhënat tregojnë se ndërsa transaksionet janë shtuar, shumat mesatare të transferuara nuk kanë qenë shumë të larta.
Vlera totale e operacioneve përmes aplikacioneve bankare në dy muajt e parë të vitit arriti në 414 milionë lekë.
Duke analizuar muajt veçmas, rezulton se në shkurt u kryen më shumë transaksione sesa në janar, por me vlera më të ulëta.
Konkretisht, në shkurt numri i transaksioneve u rrit me 4% në krahasim me janarin, ndërsa vlera e përgjithshme e tyre ra me 10.5%. Kjo përkthehet në 822 mijë transaksione me një vlerë totale prej 195 milionë lekësh për muajin shkurt.
Home banking përfshin të gjitha shërbimet financiare që realizohen nga shtëpia përmes aplikacioneve të bankave, duke përfshirë transfertat, pagesat e faturave të energjisë, ujit, telefonisë, gjobave apo detyrimeve të tjera, pa pasur nevojë për të shkuar fizikisht në bankë.
Përdorimi i teknologjisë ka sjellë lehtësi të ndjeshme, duke kursyer kohë dhe duke bërë të mundur kryerjen e shumicës së transaksioneve financiare brenda pak minutash, direkt nga telefoni. /skyweb.al
