Reshje të dendura dëbore dhe ngrica të rrezikshme kanë paralizuar udhëtimet në shumë vende të Europës, duke shkaktuar viktima dhe kaos në transport. Sipas BBC, gjashtë persona kanë humbur jetën si pasojë e incidenteve të lidhura me motin ekstrem.
Në Francë, autoritetet raportuan pesë viktima në dy zona të ndryshme të vendit, të shkaktuara nga kushtet e rrezikshme në rrugë. Ndërkohë, në Sarajevë të Bosnjë-Hercegovinës, një grua humbi jetën pasi mbi qytet ranë rreth 40 centimetra dëborë.
Qindra fluturime janë anuluar në mbarë kontinentin, duke lënë mijëra pasagjerë të bllokuar në aeroporte, veçanërisht në Paris dhe Amsterdam. Autoritetet paralajmëruan se ndërprerjet e fluturimeve pritet të vazhdojnë edhe gjatë ditës.
Në Francë, tre persona humbën jetën në dy aksidente të ndara në departamentin Landes, në jugperëndim të vendit, për shkak të rrugëve të akullta. Dy viktima të tjera u regjistruan në rajonin e Parisit: një person vdiq pas përplasjes së një makine me një kamion në lindje të kryeqytetit, ndërsa një tjetër humbi jetën pasi një taksi doli nga rruga dhe përfundoi në lumin Marne.
Edhe Ballkani është goditur nga moti i keq. Në Sarajevë, policia njoftoi se një grua humbi jetën të hënën, pasi një pemë e rënduar nga bora e lagësht u rrëzua mbi të.
Ministri francez i Transportit, Philippe Tabarot, paralajmëroi se priten reshje të tjera dëbore dhe u bëri thirrje qytetarëve të shmangin udhëtimet rrugore, duke sugjeruar punën nga shtëpia kur është e mundur. Shërbimi meteorologjik francez njoftoi se 38 departamente do të vendosen nën alarm portokalli për borë, ndërsa shumë linja hekurudhore janë anuluar.
Në Paris, autoritetet thanë se aeroporti Roissy Charles de Gaulle do të anulonte rreth 40% të fluturimeve për disa orë në mëngjes, për të pastruar pistat nga dëbora. Aeroporti Orly, nga ana tjetër, planifikoi anulimin e rreth 25% të fluturimeve në të njëjtën periudhë.
Situata mbetet kritike edhe në Holandë. Në aeroportin Schiphol të Amsterdamit, mbi 400 fluturime u anuluan, duke shkaktuar radhë të gjata dhe konfuzion mes pasagjerëve. Sipas transmetuesit NOS, edhe rreth 600 fluturime të tjera të planifikuara për sot janë anuluar.
Shumë prej fluturimeve të anuluara operoheshin nga kompania KLM, e cila njoftoi se po përballej me mungesë të lëngut për shkrirjen e akullit, duke fajësuar kushtet ekstreme të motit dhe vonesat në furnizim. Administrata e aeroportit Schiphol deklaroi se ekipet po punojnë pa ndërprerje për pastrimin e pistave dhe për garantimin e sigurisë së fluturimeve.
Probleme u shënuan edhe në transportin hekurudhor holandez, ku të gjitha shërbimet u ndërprenë përkohësisht në orët e mëngjesit për shkak të një defekti në sistemet IT. Edhe pse disa trena rifilluan qarkullimin pas orës 09:00, vështirësitë vazhduan gjatë gjithë ditës, ndërsa shërbimet Eurostar nga Amsterdami drejt Parisit u anuluan ose u vonuan.
